Aizawl: Health Minister Lalrinpuii’n tun hnaia Mizoram Universal Health Care Scheme (MUHCS) kalpui a nih hnua sorkarin Zoram Medical College & Hospital (ZMC&H), Falkawn tihchangtlunna tur atana hmalakna hrang hrangte nimin khan a endik.
ZMC&H a tlawhnaah hian Minister Lalrinpuii chuan thawktute inpekna chu lawmawm a tih thu sawiin, hmalakna kal mekte pawh zawh fel thuai a beisei thu a sawi a. Thawktu hrang hrangin harsatna leh mamawh an sawite chu sorkar chuan thawktute leh mipuite tan theihtawpa hma a lak zel tur thu a sawi.
Health Minister chuan tun hnaia MUHCS kalpui a nih hnua ZMC&H tihchangtlun nan, khum 26 awmna Medicine Ward chu a hma thei ang bera hman hman tan nghal nise a ti a, khum 10 awmna Gynaecology Ward pawh hman tan nghal a nih tur thu a sawi bawk.
MUSHC kalpui a nih hnuah cabin 10 awm thinah cabin 10 hawn belh a lo ni tawh a, nimin vek khan cabin 10 dang hawn belh leh niin, cabin 10 dang pawh hawn leh thuai tura ruahman nghal a ni.
- MUHCS kalpui hnua ZMC&H tihchangtlunna langsarte:
- Khum 26 awm thinah Orthopaedic Ward-ah khum 30 dah belh.
- Nausen piang hlim enkawlna, Neonatal Intensive Care Unit (NICU) pahnih hawn a ni a, pariat a awm mek.
- Pediatric Intensive Care Unit (PICU) tuna awm mek pathum bakah pakhat dang dah belh tum mek.
- Integrated Care Unit (ICU) awm tawh sa 13 bakah 13 dang hawn thar a ni dawn a, khawl rem hna buaipui mek.
- Operation Theatre panga – Gynaecology (2), Cardiology (1), Neurology (1), General (1) hawn thar tura hmalak mek a ni. Tunah OT hi panga hman theihin a awm mek.
- Cardiology Ward thar, khum paruk awmna chu hawn theih tura chak taka hmalak mek.
- Thawktu indaih lohna phuhru turin MUHCS multitask worker mi 20 leh casual nurse 64 lak thar an ni tawh a, heng bakah hian Junior Resident (JR) lakna tur buaipui mek a ni bawk.
- Dr Zothansanga Zadeng, MCH Neurosurgery (Super Specialist) chuan a zirlai zir zoin, ZMC&H a zawm leh tawh a, mipui tan inentir a theih leh tawh bawk.