Aizawl: Public Accounts Committee (PAC) Chairman Lalchhandama Ralte leh Principal Accountant General (Mizoram) Samar Kant Thakur te nimin khan an inkawm.
Assembly Annex-a an inkawmnaah Samar Kant Thakur chuan PAC hmalaknaah Judiciary a huam leh huam loh sawihonaah, High Court leh Supreme Court thlengin a huam a. Amaherawhchu, office establishment chauh an khawih thei tih a sawi a. Sorkar department leh ministry-te excess expenditure chu PAC chauhin a regularize thei a, a process muang deuh mah se, PAC hnathawh chu a effective hle tih a sawi.
PAG hian PAC Chairman Lalchhandama hnenah rawtna thlenin, Mizoram PAC chu Central PAC kalphung anga kal ve tur a duh thu leh a tul a nih chuan workshop/seminar buatsaih tura a inpeih reng thu a sawi a. Comptroller & Auditor General of India hnena PAC report thlen chu an hnathawh ber a nih thu a sawi bawk.
Leader of Opposition Lalchhandama Ralte pawhin PAC chuan theihtawp chhuaha hna an thawh thu leh tun hnaiah pawh Mizoram khaw chhak lam leh chhim lamah site visit neia an fehchhuah thu a sawi a. Sorkar department-te pawisa hmanralna uluk taka enzui a tul thu a sawi bawk.
An inkawmnaah hian AG Official bakah Mizoram Legislative Assembly Secretariat-a Addl. Secretary Lalthangmawia leh Committee Officer John Lallawmsanga Sailo te an tel bawk.