Aizawl: Mizorama Employees’ State Insurance (ESI) din leh sports stadium sak chungchangah Minister of State Lalnghinglova Hmar chuan nimin khan Union Minister for Sports leh Labour & Employment Dr Mansukh Mandaviya chu New Delhi-a a chenna inah a kawm.
An inkawmnaah LESDE minister chuan ESI scheme hnuaia damdawi in khum 30 awmna sa turin mi 15,000 tal inziah luh a ngai a, hei hi state tê leh mihring tlem, industry lian awm lohna Mizoram tan tlin a har thu a thlen.
Dr. Mandaviya chuan minister ngenna chu a ngaih pawimawh thu leh ESI hnuaia damdawi in sak chu tihsak ngei a tum tur thu a lo hrilh.
Sports minister ni bawk, Lalnghinglova Hmar chuan, “Indian Super League leh I League season hnuhnung berah pawh state angin Mizoram player-ten an khel tam ber. Tuna kan thlen chin atanga hmasawn zel tur erawh chuan infrastructure tha kan neih belh a ngai a, state dang nen khaikhina zahpuiawm lo tur football stadium kan mamawh,” tiin, National Sports Policy (NSP) thar zulzuiin PSU rintlak thawhpui tur zawnsak turin a ngen.
Union sports minister chuan NSP thar chuan Indian sports-ah a tha zawnga danglamna a thlen ngei a beisei thu a sawi. Mizorama football stadium mai ni lo, sports infrastructure hmasawn nana thawhpui tur PSU thlan thuai a nih tur thu leh, PSU hotute nena meeting hunah pawh Mizoram sports minister chu a koh tel ngei tur thu a lo hrilh.