Environment, Forest & Climate Change Minister Lalthansanga kaihhruaiin nimin khan United Nations hnuaia Green Climate Fund (GCF) chungchanga inrawntawnna leh inzirtirna hun Wild Life Warden Conference Hall, MINECO-ah neih a ni.
EFCC Minister Lalthansanga chuan GCF chungchanga inzirtirna hun siam a ni chu lawmawm a tih thu sawiin, official-te chu Mizoram tana tangkai thei ang bera hman a nih theih nan a tul anga ruahmanna siam turin a chah.
Revenue Minister B. Lalchhanzova pawhin thu sawiin, GCF chu green-house gas emission chhuah nasatin ram thang mekte a nghawng nasat avanga siam thatna leh venhim nana hman tur anih angin, India ram pawna hman tangkai tan a nih thu a sawi a. GCF hmang hian ei leh bar zawn kawnga sik leh sain mipuite a nghawng loh nana hmalak a tul thu a sawi.
Green Climate Fund-ah hian US dollar billion 100 awmin, hei hi khawvel sik leh sa danglam zel tur venna leh sik leh sa danglam mila eizawnna leh hmasawnna kalpuina tur fund a ni. Tun dinhmunah India ramah GCF project 13 kalpui mek niin, Mizorama GCF hman tangkai ve dan tur te, a kalphung leh a tihdan turte EFCC atangin Director (ED) Abhishek Acharya leh Technical Officer Pooja Verma ten an zirtir a ni.