Mizorama Aizawl leh West Bengal-a Kolkata chu kum 2027 atang chuan km 700-a tihtawi a ni tawh dawn a, India-in Myanmar puihna nena an siam mek, Kaladan Multi Modal Transit Transport Project (KMMTTP) chu hetih hunah hian hman theih a ni tawh dawn tih Shipping Minister Sarbananda Sonowal-a’n Thawhtanni khan a sawi.
KMMTTP hi India-in ‘Chicken’s Neck’ tia a sawi, Bengal-a Siliguri kaltlanga hmarchhakte a tlawhpawh theihna awm chhun ni mek bak kalna kawng dang a ni dawn a, Bangladesh a kaltlang bawk ang.
Sonowal-a chuan shipping ministry chuan tuikawng siam nan Rs vaibelchhe 1,000 a ruahman tih a sawi a, a bak chu mi dangin an thawh ve bawk tih a sawi.
“Inkalpawhna tel lo chuan eng inthlak danglamna mah a thleng thei lo,” a ti a. “KMMTTP hi India Myanmar Friendship Treaty rah chhuah a ni a. India-a hmarchhak leh Myanmar pawh awlsam lehzualin a inkalpawh theih tawh dawn a, kum 2027-ah chuan a nih dan tur ang taka hman theih a ni tawh ang,” a ti.
Prime Minister Narendra Modi-a hmathliarah hmarchhak chu India hmacsawnna laimu-ah a tel tih Sonowal-a chuan a sawi bawk.
“Pu Modi-a hmalaknaa ‘Act East’ policy hmangin tuipui atanga tlawhpawh theih loh ram hi khawvel huap tuipui zinkawng hmangin tawi leh awlsam zawkin a tlawh theih tawh dawn a. Myanmar-a Sittwe lawngchawlh hmun peih a ni ta hian hei hi a taka tih a ni dawn tih a tilang chiang a ni,” tiin union minister chuan a sawi.
KMMTTP hi a nih dan tur ang taka peiha hman a nih hunah chuan India hmarchhaka mite tan mai ni lo, Bangladesh, Bhutan, Nepal leh Myanmar tan pawh Asia chhimchhak ramte nen sumdawnna kawngah inpawhna awlsam zawk an nei dawn tih Sonowal-a chuan a sawi bawk.
Kaladan River hi Myanmar-a Paletwa atangin km 159-a hla niin Mizoram atangin kawngpuiin km 110-a thuia thlen theih a ni bawk tih Sonowal-a chuan a sawi a, kawngpui hi siam mek niin kum 2027-ah peih a ni dawn tih a sawi.
Sittwe lawngchawlh hmun leh Kaladan project hi Tripura pawhin chhawrin thil phur leh veivahna kawng a titawi ang a, phurh man a tlawm sawt dawn niin Sonowal-a chuan a sawi a. Myanmar atanga Sittwe atanga thawn chhuah tam zingah buhfai, thing, sangha, lui lam sa, petroleum product, puanthan leh la lam chi a tel.
Sittwe-a phurh luh zingah cement, thir leh leirawhchante chu a langsar zual a ni.