Home Minister K Sapdanga’n Mizoram larsapin Chakma Autonomous District Council (CADC) thiata Governor Rules hnuaia a dah chu Council of Minister ngaihdan ni lo zawnga thutlukna siam a nih thu a sawi a. CADC a thiahna hi sut leh (revoke) ni se tih hi Council of Ministers ngaihdan a nih thu a sawi.
Thawhlehni khan Secretariat Conference Hall-, MINECO-ah thu thar thehdarhtute kawmin Home Minister K Sapdanga chuan July 7, 2025-a CADC thiat a, Governor Rules hnuaia dah a nih chungchangah mipui tana thil ngaih sual palh theih a awma hriat avangin thil awm dan a sawifiah.
Home minister chuan CADC-ah elected member 20 an awm thu leh heng zinga member 16 chuan tun hnaiah ZPM party an zawm thu a sawi a. Heng MDC 16 hian ZPM Legislature party insiamin, CADC sorkar an siam thei a ni tih June 16, 2025 khan an lantir tih a sawi a. Heng MDC 16-te hi Aizawlah kalin larsap hmaah June 18, 2025 khan an inlan thu leh CADC-ah ZPM Council sorkar an siam theih thu an thlenin, siamtir turin an dil nghal thu a sawi.
Chief Minister Lalduhoma pawhin larsap hnenah member 16 nei ZPM Legislature Party chu CADC-ah sorkar siamtir mai tha a tih thu a lo thlen tawh tih a sawi bawk.
K Sapdanga chuan, “Larsap-in Council of Ministers ngaihdan ziaka thlen tura a phut angin Council of Ministers chuan lungrual takin, sorkarna siam thei an awm chuan council thiah chu tha a tih loh thu leh, member 16 nei ZPM MDC-te chu CADC-ah sorkar siamtir mai turin, July 5, 2025 khan larsap hnenah ziakin Council of Ministers ngaihdan thlen a ni,” a ti.
Chief minister awm loh hlana a aiawhtu, home minister chuan larsapin Council of Minister ngaihdan ziaka thlen tura a dil hnuah, Council of Ministers ngaihdan ni lo zawnga thutlukna a siam leh ta tho si hi a vanduaithlak an tih thu sawiin, “Democracy zahawmna tihmelhem thei ni hialin kan hria,” tiin, larsap hian CADC a thiahna hi sut leh (revoke) ni se tih hi Council of Ministers ngaihdan a nih thu a sawi.
Zawhna chhangin District Council & Minority Affairs Minister C. Lalsawivunga chuan Autonomous District Council-ah anti defection law a awm loh avangin nihna inchuh avangin sorkar a nghelngheh theih loh thu a sawi a. Hei hi chief minister pawhin a lo sawi tawh angin 125th Ammendment-ah anti defection law chu sorkarin an rawt ve thu a sawi a ni.