Aizawl: Zokhawthar Branch YMA chuan an khaw chhungah raltlan emaw, khaw chhung mi pawh ni se Mizo tawng chiah hmang turin an ti.
Nimin chhun khan Zokhawthar Branch YMA chuan an khaw chhungah raltlan emaw, khawchhung mi emaw pawh ni se, Mizo tawng ni lo, mahni hnam bil tawng reng reng hman phal a nih loh thu hriattirna chu tlangauin a puang.
Zokhawtharah hian bazar leh khawhar in velah tawng bil hmanga inbiakna a tam thin avangin inlungrual nan Mizo tawng chiah hman hi an lo kalpui tawh thin a. Tun tuma Myanmar buaina thar avanga hetianga hma la thar ni lovin an inhriat thartir lehna niin an sawi.
Tun hnaia Myanmar chhunga Zohnahthlak sipai pawl pahnihte inkahna avangin Zokhawtharah hian raltlan 4,000 vel an awm mek a, chhungte belh tur nei lo chu Community Hall-ah awmtir a ni.
Zokhawthar Village Level Committee on Myanmar Refuge (VLCMR) chuan raltlante ei tur leh mamawhte an buatsaihsak thin a ni.