Contractor hming hawhte hian midang an tilawm em?
Mizoram budget 2022-23 house a pharh hnuin, thu thar thehdarhtute a kawmnaah chief minister leh finance minister ni bawk Zoramthanga chuan, chhiah thar lak tumna emaw, tihpun tumna emaw a awm loh thu a sawi a; chungte thuhran lo ni ta se, Kamrula chungchang zawhna a chhannaah, ‘Kamrul-a hian contract a hmu teuh a, Kamrul-a lo pawhin an hmu teuh,’ a ti bawk.
Contract hnathawh chungchangah PWD-a first class contractor kan neihte hian hna eng emaw zat an thawk a. Tlang takin sawi ta ila, an hming kan hawh a ni a,” tiin, hna a tak taka a thawh vek pawh a nih loh thu a sawi a. Zoramthanga hian, “Tun hma pawhin hming hawhin kan thawk tam em em a. Kamrula pawh kan duhsak bik a, kan duhsak lo bik pawh a ni lo. A thawktu hmingah an lo hmang a, chutia kal chho a ni a, a dang pawh mi thawh hi a tlar thui khawp mai,” a ti bawk.
Sorkar hian hming hawhin hna a thawk nasa hle tih a lang reng mai a, mahse a hlawkna teltuah tak tak hian mipui lam hi kan tel ve em tih erawh ngaihtuah zui ngai tak a ni. Sorkar lai party worker ho an vui thawm hriat tur a tam hle mai a, an hming hawhsak ho hian an hui vek ta mai emaw tih tur a ni hial. CM hian hming an hawh thu hi a sawichhuak a, an hming hawhsakte hian an mipui chanvo lam an siamsak ve tak thu hriat tur a awm ta lem si lo nen, hei tak hi party worker tam tak lungawi lohna chhan nia sawi hi a ni thei ta mai ang em? Ngaihtuah chian a ngai chhunzawm ta hle mai.