Aizawl: Aizawl West II bialtu MLA Lalnghinglova Hmar, Sports & Youth Services Minister chuan tun hnaia Undergraduate Exam 2025 leh Postgraduate Exam 2025-a a bial chhung atanga top 10 a langte lawmpuina hun a pisa-ah a buatsaih. Top 10-a langte hi pawisa fai Rs. 10,000 theuh leh lawmpuina thuziak a hlan.
Minister Lalnghinglova chuan an chhehvel boruak a zir hian thil thenkhat hi chu a lo chhuak mai thin avangin, thenawm velah lehkhathiam an tei sup sup chuan an naute zel pawhin lehkhathiam ve an chak dawn a. Chu chu tuna an thiam ang tawka lawmpuina hun an buatsaih chhan a nih thu a sawi a. “Lawmpuina tam tham tak pawh kan inpe thei lo va, amaherawhchu a hminga hetia lawmpuina kan inpek hian naupangin an lo hmu ve ang a, lehkhathiam te chak ve se, nangmahni tan mai ni lovin kan vengah, kan velah lehkhathiam hi chawimawi lo ni se tih kha kan rilru a awm a ni,” a ti.
“Tuna in thlen chin hi hlawhtlinna kailawn ania, a harsa lai in thleng dawn chiah. Competition tak tak a intan dawn a, class-a inti tha hi ka lawmpui hle che u a, mahse a zawhna a ni lo. In kalkawng a intan dawn chiah a ni,” a ti bawk.
Tun tumah hian Aizawl West II chhung atangin UG leh PG Exam-ah subject hrang hranga top 10 a lang thei mi pariat lawmpui an ni.