Aizawl: MPCC Treasurer Dr Lalmalsawma Nghaka chuan mau atanga meihawl siamna tur, Sairanga Bamboo Technology Park chu khar a nih der tawh tih sawiin, he hmun atanga meihawl siam chhuahte pawh hmantlakah ngaih a nih loh thu a sawi.
Sairanga meihawl siamna hmun, Bamboo Technology project chu nimin khan Dr Lalmalsawma Nghaka hian tlawhin, helai hmun an kalpui dan a enfiah a. He meihawl siamna hmun sorkarin a din a tlawhnaah hian, an hawn lai vela hma an lak bak kha chhunzawm a awm ta miah lo tih sawiin, “An meihawl siamchhuah lah hi a hnip em em a, a sawm nghal vek zel avangin helai Sairanga thingpui dawr te pawhin hmantlakah an ngai lo,” a ti.
Dr Mala chuan May ni 14 khan sorkarin Rs nuai 252.826 sengin a hawng tih sawiin, he project-ah hian mau atanga meihawl siam an tum bakah mai sawngbawla kum 50 thlenga dah that theiha siam an tum tih a sawi a. “Sorkar Press Release a an ziah dan chuan he project hian ni tin meihawl ton 3 a siamchhuak thei dawn a, kum khatah ton 9000 vel siamchhuah an tum a, mau pawh ni tin pum 670 vel a mamawh anga chhut a ni. Chu chu ZPM research base a ni em ka hre lo va, DPR pawh kan nei lo; mahse, sorkar PR-ah a inziah dan a ni,” tiin, research base a kal tura intiam ten he plant hi an hawn rualin an kalpui zawm thei lo nghal chu mak a tih thu a sawi.
“Chief minister-in kumin May thlaa Bamboo project hawnna a neihah khan a tawiawmtu Minister pakhat phei chuan mau sawngbawlna lamah Mizoramin bung thar a kai dawn tihialin a sawi a nih kha. Bung thar kaia hnekin tunah khar a ni der tawh a. Mipui sum nuai za tel tehmeuh luan raltirin a awm hi vanduaithlak kan ti a ni,” tiin Dr Mala chuan, he project-a sum an hman ai hi Sairang leh Kawnpui inkar kawng chhe zual lai siam nan lo hmang se, tuna harsatna kawng chhiat em vanga mipuiin an tawh hi a tawh a rin loh thu a sawi bawk.