Aizawl: Chhinga Veng Local Council leh Branch YMA tangkawp chuan an veng chhunga Myanmar raltlan kokhawmin, chhungkaw pa ber ID (Burma) chu an kawl thatsak a, veng chhung an chhuahsan dawn chauhin an ID hi pek kir leh dawn.
Zirtawp zan khan raltlante hi chhungkaw pa ber theuh kohkhawm an niin mi 140 an kal a.
Chhinga Veng Local Council Chairman TBC Lalchawiliana chuan raltlante chu an veng chhungah thlamuang taka awm tur leh harsatna an tawk anih chuan theihtawpa puih an inhuam thu a sawi a. Raltlan zingah mi fel tak awm mah se, mi tha lo, ruihhlo tawlh ching an awm thin chuan ram a tibuai thin tih sawiin, an veng chhunga raltlante chuan ti ve lo va, do pui zawk turin a chah a. Ram leh khawtlang duhdan chu an awm chhunga zawm zel turin a fuih bawk.
Chhinga Veng YMA President C.Laldinsanga pawhin ram buai avanga raltlan, an veng chhunga awm te chu inluah danah veng chhunga awm sa te hnawtchhuak a, a aia to a luah dil an awm thin chu ti ve lo tur te, voters ID dik lo taka nei lo tur te in a fuih a. Tun hnaiah hnam bil leh chi bil anga in tel hrang te, inkhawm hrang te an awm chu tha lo a tih thu sawiin, kohhran an bel anih pawhin heta kohhran awmsa bel ve mai turin a fuih bawk.