Aizawl: India rama sorkar damdawi in tha tehnaah Kolasib District Hospital tling thar a. Mizoram puma district hospital 12 awm zingah NQAS National Certificate hmu hi pasarih an awm ta a ni.
Dr. Lily Chhakchhuak, Mission Director, National Health Mission, H&FW department atanga thu dawn danin, India rama sorkar damdawi in tha bik tehna, National Quality Assurance Standards (NQAS)-ah Kolasib District Hospital chu an tling thar a, tehna-ah 96.39% te an hmu.
Heti hian Mizoram chhunga sorkar damdawi in 37 te chu NQAS national certificate nei tawh an ni a. Tunah hian sorkar damdawi in 22-in state level certificate nei tawhin, national certificate result nghak mek paruk an awm bawk.
Health Minister Lalrinpuii chuan, India rama damdawi in tha bik thlan chhuah zingah Mizorama damdawi in an awm belh zel chu Mizoram tan mellung pawimawh tak a nih thu leh damdawi in, district leh state-a thawktu zawng zawng te thawhrimna leh taimakna chhuanawm a tih thu sawiin, heng tehnate hi sorkar damdawi in pantu damlote chu a chhawr tangkai bertu tur an nih thu a sawi.