Prime Minister Narendra Modi leh Union Home Minister Amit Shah te chuan Pathianni khan a hrang ve vein President Droupadi Murmu-i chu a chenna, Rashtrapati Bhavan-ah an kawm.
Prime minister leh home minister ten president an len chilh chhan hi hriat a ni lo va, an pisa ve ve pawhin engmah puan an la nei lo va. Rashtrapati Bhavan erawh chuan an len thu hi a hranin X-ah an tar lang thung.
“Prime Minister Pu Narendra Modi-a’n President Droupadi Murmu chu Rashtrapati Bhavan-ah a kawm,” tiin Rashtrapati Bhavan chuan X-ah a tar lang hmasa.
A hnu darkar tam liam hmain Rashtrapati Bhavan vek hian, “Union Minister for Home Affairs leh Cooperation, Pu Amit Shah-a’n President Droupadi Murmu-i Rashtrapati Bhavan-ah a kawm,” tiin an tar lang leh.
Tun hi tun hnaia UK leh Maldives tlawha a zin haw hnuah prime minister-i president a hmuhna hmasa ber a ni.
Sorkara hotu lawk pahnihin president an kawm hi parliament fur thutkhawm kal mekah eptuten assembly inthlan hun tep tawha Bihar-a vote nei list ennawnna, Special Intensive Revision (SIR) kalpui mek sawiho phuta rorel an tihbuai hun lai a ni a. Ram rorelna sang in hnihah hian Operation Sindoor sawiho lai tih lohvah chuan July 21 atanga tan tawh ni mah se rorel a la mumal thei mang lo.
Lok Sabha-ah hian kar hmasa khan Manipur-a President’s Rule kalpui mek thla ruk dang pawh sei remtih a ni tawh a, Rajya Sabha-ah phei chuan hei hi sawiho tura chhawp chhuah pawh a la ni lo va. Hmarchhak state-ah hian President’s Rule hi February 13 atanga hman tan kha a ni.
Prime minister leh president inkawm hi US President Donald Trump-a’n India-in an rama bungrua a thawn luhah chhiah 25% lak a tum thu a puan leh New Delhi-in Russian sipaiu hmanrua leh tuialhthei a lei avanga hrekna a kalpui dawn thu a puan hnu a ni.
July 21-a vice president atanga Jagdeep Dhankhar-a’n president hnena a hrisel lohna chhuanlama bânna a thehluh hnua inkawm lehna hmasa ber a ni bawk a. Vice president hi Rajya Sabha chairman dinhmun chelhtu a ni.
Election Commission of India chuan kar hmasa khan vice president thar thlan tur hi September 9-ah neih turin a lo puang tawh.
Vice-president inthlanah hian Rajya Sabha leh Lok Sabha member-ten vote an thlak thin a ni.