UN chuan Gaza-a naupang kum nga hnuai lam zawng zawng chu ei tur tlakchham vanga an nunna derthawng an nih thu a sawi a, hetih lai hian Israel-in Gaza Strip-a puihna lut tur a dan avanga tama thi an pung zel bawk.
UN hnuaia World Food Programme chuan naupang kum nga hnuai lama 3,20,000 vel chu ei tur tha an hmuh loh vang leh tui thianghlim, hnute tui aia pek tur thil dang leh mamawh dang a awm loh vek avangin an dinhmun a chhe hle.
Paediatrician Seema Jilani chuan heng naupangte hian ‘an taksa pumin an tuar’ tih sawiin an taksa peng tam tak a chhia niin a sawi a. Gaza-a tam tla chuan naupangte nakin zel nun pawh tiawngrawpin ‘an nih tur ang an ni pha dawn lo’ niin a sawi.
Gaza-a damdawi inte chuan Thawhtanni khan darkar 24 chhungin tam leh ei tur neih loh vangin naupang pakhat telin mi paruk an thi leh tih an sawi a. Indona a chhuah atangin riltam kaihhnawiha thi hi naupang 94 telin mi 181 an tling tawh.
Gaza-a sorkar chuan Israel hian puihna phur truck 22,000 chuang zet an dang niin an sawi a. Palestinian chenna ram hi thla hnih inkahhai puan a tawp atanga rei lo te, March 2 atangin Israeli hian a dang a ni.
Save the Children International Middle East director Ahmad Alhendawi chuan Gaza dinhmun chu ‘engmah awm lo ang’ a nih thu a sawi.
“Thla li chuang mamawh luhna dan a nih avangin ei tur kham lohna leh tamnna a nasa hle a, hei hi titawp tur chuan ei tur leh damdawi hmanrua bakah naupangte mamawh ei tur chak a ngai a ni,” a ti.
An pawl hian nau pai leh nau hnute chawm lai nei 10-a pali (43%) chu July thla chhung khan Gaza-a an damdawi inah ei tur tlakchham vanga chak lohna avangin an enkawl niin an sawi.