Aizawl: Mizoram Larsap Gen Vijay Kumar Singh-a’n tun hnaia Mizoram University (MZU) in National Assessment and Accreditation Council (NAAC) A+ Grade hmuh lawmna a hmanpui a, MZU e-Office Portal a tlangzarh nghal.
MZU Auditorium inkhawmah larsap General Vijay Kumar Singh, Chief Rector, MZU chuan MZU in NAAC A+ Grade a hmu thar chu a lawmpui thu sawiin, University la naupang tak kum 2000 a din, 2001 a kalpui tanin hun reilote chhunga hlawhtlinna hrang hrang a hmu leh India hmarchhak bakah ram puma zirnna tha zinga chhiar tel a ni chu chhuanawm a tih thu a sawi.
Larsap chuan NIRF-in India ram University tha zual a thlan chhuah top 100 zinga MZU a lang pha char char leh tunhnaia 77-na dinhmun a hauhte, Central University bik inelna IIRF tehnaah 15-na dinhmun a hauh phate chu chhuanawm a tih thu a sawi a. Hmasawnna tur tam tak a la awm thu leh endikna neih leh hunah tun aia result tha zawk neih ngei a beisei thu sawiin, tumna tak tak neia hmasawnna lian zawk an ngaihtuah phawt chuan hlawhtlinna an chang thei tih a sawi.
Larsap chuan zirnain a tum ber khua leh tui tha leh hruaitu tha chherchhuah kawnga tanlak a tul tih sawiin, zirlai leh zirtirtute chu taimakna leh tumruhna hmanga University chawisangtu nih tum turin a fuih a. Nakin hun atana inpuahchah lawk tur leh zirbingna, thil thar ngaihtuah chhuah leh tunlai thiamna hman tangkai kawnga hmahruaitu nih tum tura fuihin, State University tan mai tur atana lo inruahman lawk turin a chah nghal bawk.