Aizawl: P&E Minister F. Rodingliana’n nimin khan Lungleia Sazaikawn Sub-Station, Kawmzawl Sub-Station leh IIDC Pukpui te a tlawhin an dinhmunte a enfiah.
Lunglei West bialtu MLA T. Lalhlimpuia ngen angin P&E Minister F. Rodingliana chuan Lunglei Saizaikawn Sub-Station chu a tlawh a. Hauruang, Vanhne tlang dung, Vaisam leh Lunglei West huam chhung vengte chawmtu Sazaikawn Sub-Station harsatna chu a hmunah enin, bialtu MLA leh P&E hotute nen Sub-Station-in a chawm khua leh vengte’n eng dawn chungchanga harsatna an tawh te, line leh khawl mamawh leh tihchangtlun tulna te, harsatna phuhrukna tur leh tiziaawm tura department atanga ruahmanna awm sate leh tha zawka hma lak a nih theih dan tur te sawi ho a ni.
P&E Minister hian Kawmzawl Sub-Station pawh tlawha a dinhmun a enfiah bakah, Commerce & Industries Department hnuaia Pukpuia Integrated Infrastructure Development Centre (IIDC)-in kawlphetha a mamawh phuhruk tura transformer dah belh dan tur leh eng pekna atana thil tul hrang hrang a enfiah bawk.
P&E Minister-in Sazaikawn Sub-station a tlawhnaah hian Lunglei West bialtu MLA T. Lalhlimpuia, Lunglei Municipal Council (LMC) Vice Chairman K. Lalrinawma, Ward No. 5 Councilor Zonunmawii, P&E hotute leh thawktute, Rahsiveng leh Sazaikawn Local Council leh YMA hruaitute leh party hruaitute’n an tawiawm a ni.