Los Angeles hmarthlang lama khaw lum uchuak tak leh khaw ro lutuk avanga ram kang nasa tak avangin mi tam tak an inthiar chhuak.
Canyon Fire an tih hi Ningani chawhnu atanga Ventura leh Los Angeles county inrina vela chhuak niin acre 30 atangin acre 5,400 dawna zau a kang tawh.
Ram kang hi Inrinni zan thleng khan 28% thunun tawh ni mah se mi tam tak inthiar chhuak an awm.
Khaw lum lutuk leh ro lutukin kang thelh hi a tiharsa hle niin Ventura county chuan thuchhuah an siam a, mi 1,148-in a thelh hna an thawk mek tih an sawi.
“Thawktute hi zanah pawh chawl lovin a kan kai belh zel lohna turin an veng pah bawk a ni,” tiin LA County Fire Department chuan thu a chhuah.
“Zan lamah hian kang hi a chak lo deuh va, hei hi thawktute pawhin hma an sawnpui hle a ni,” a ti bawk a. Hetih lai hian khawchhak lam hawiin, Los Angeles County-a Castaic panin a kang zel tih a sawi.
Los Angeles-ah hian khaw lum hian 37.7°C kai chho tura sawi lawk niin mi chengte pawh inring turin an ti a. Ram kanna hnaih ber zinga mi, Santa Clarita khawpuiah chuan mi chengte chu kang chhuahna hnaiha awm lo turin an ti.
Canyon Fire hi California Department of Forestry & Fire Protection (Cal Fire) chuan an state chhunga kang mek zinga pakhat a ni a. Tuna kang nasa mek chu Gifford Fire niin Luis Obispo leh Santa Barbara county-ah acre 1,00,000 dawna zau a kang tawh.
Mi thiamte chuan sik leh si inthlak nasa avangin California-ah hian ram a kang nasa thei niin an sawi lawk a. A lum zual a, a ro zual a, hei hian ram kang chhuah duh hun a tirei niin an sawi.
Kumin January khan Eaton Fire leh Palisades Fire chuan Los Angeles-a veng hrang hrang kangin mi 31 an thi a, chenna in sang tel a tichhe bawk.