Kan inkalpawhna kawngpui a chhe hle a, company a ni emaw, state sorkar enkawl a ni emaw a danglam chuang lo. Hmun tam takah zawh ngam loh a awm nual ta!
Sorkar lah chuan a vei em em pawhin a lang lo a, phai lam atanga kan bungraw lakluhna Sairang kawng lamah chuan nitin Minister/MLA kha an inkalchhawk thin a, eng nge an tih ang aw?
Tin, sorkar lai party Thalaite khan hnatlangte kha an zu nei bawk a nih kha. Eng nge an tih ang aw!? Eptu party lam tihtur niawm tak tak hi ‘Kalphung tharah’ hian kan hmu chho zel nite hian a hriat a, kan kawngpuite hian that zel phah tak i maw?
Sorkar hian pawisa a nei lo tak zette pawh a ni ang. Sum lengvak a tlem em em a, kawngpui siamna turte hi dah thuai thuai thei se la, an officer te ngam leh thunun ngam an inti bawk a, vil zui nasa se la, kawngpui hi mutmawh hnarmawhah nei mawlh tawh se a va tha em.
Ram hruaitute hi zin nasa leh lirthei hmang nasa an ni a, kawngchhia leh tha lai pawh hre ber tur an ni. Pawl hrang hrangin nawrh an huaihawt hun nghak kher thin lo hian che zung zung thei se la, mipuite tih lawm hi chu kan har lo asin.
Kawngpui hi sorkar in ngaih pawimawhah a nei lo a nih chuan kan la aupui tluang zel dawnin a lang tlat. Nuar thei hrang hrang an rawn awm chho leh ngei bawk ang. Kumtin kan buaina pakhat ni fo hi sorkar hian veiin, che chak mawlh tawh teh se.