Mizoram châk lakna kawngpui a chhiat avanga lirthei tangkhangte chhuah mek niin Aizawlah mipui ni tin mamawhte phurh luh mek zel a ni.
Nimin chawhma dar 10 atanga tlai dar 6 chhung khan Kawnpui atangin Aizawl pan lirthei 215 chhuah a ni a. Heng zingah eirawngbawlna gas phur lirthei pakua, petrol phur 13 leh diesel phur pathum an tel.
Mualkhang/Khamrang atanga Kolasib/Assam pana Sairang peng paltlang lirthei 64 chhuah an awm a. Aizawl pan leh Kolasib/Assam pan lirthei an chhuah zawng zawng hi 279 a ni.
Hetih lai hian Sairang kawng siam hna thawh mek chu lirthei nawlpui zawh theih tura siam tan a nih avangin Aizawl SP Rex Zarzoliana Vanchhawng chuan August 8, 2025 atanga thu leh awm hma chu 407 truck leh a tlukpui lirthei tan Durtlang leh Kawnpui inkar kawnga tlan phal a nih loh thu leh 407 truck leh a tlukpui lirtheite chu NH-06 Sairang road lamah tlan tawh turin thupek a chhuah a ni.
Thupek hian lirthei LMV chin hnuai lam, chhiatrupna thil, kangmei leh emergency kaihhnawiha duty, dan leh thupek pawimawh bik a Police leh magistrate duty-te chet velna a huam lo va. He thupek bawhchhia dan anga hrem theih a ni.