Olympic medal la thei, PV Sindhu chu kumina BWF World Championships khelh turah India aiawha tel tur zinga seeded player awm chhun a ni.
India badminton player zinga world champion ni thei awm chhun, Sindhu hi hmeichhe single khel tur 16 zingah 15th seed niin champion lai, An Se Young chu top seed a ni a, world champion vawi hnih lo ni tawh, Akane Yamaguchi chu 5th seed a ni.
Copenhagen-a 2023 World Championships-ah khan India chuan mipa single-ah top 16 seed an lo nei tawh a, HS Prannoy chu No. 9 niin Lakshya Sen chu No. 11 a ni a. Kuminah chuan mipa lamah top 16 a lang pha an awm lo.
BWF World Championships 2025 seeding hi Zirtawpni kal taa world ranking chhuak thar behchhana siam a ni.
Sindhu chuan boruak tha tak neih theih a tum hle a, kumin kum tira India Open-ah khan quarter final a lut a, kha bak kha quarter final thlen a la nei leh lo a. Sen chuan All England Open quarter final a lut a, Asian Open-ah erawh a che tha ta vak lo.
World No. 21 ni mek, Sen hian khawvel huap inelnaah sulhnu tha tak a neih leh theih beiseitu an thahnem hle.
Prannoy chuan kum 2023 khan bronze medal a lo la tawh a, tunah hian No. 34 a ni mek a. Season kal mekah tournament 11 a khel tawh a, hengah hian quarter final thlen theih a la nei miah lo.
Mipa double-ah World No. 1 ni thin, Satwiksairaj Rankireddy leh Chirag Shetty te inkawp chu 9th seed an ni a. Hmeichhe double-a inkawp, Treesa Jolly leh Gayatri Gopichand te chu 12th seed an ni a, mixed double-ah Dhruv Kapila leh Tanisha Crasto te chu 16th seed an ni bawk.