India Test team captain Shubman Gill leh India player tha dangte pawh an inlanna tur, Duleep Trophy-ah Mizo tlangval, Jehu Anderson chu North East Zone aiawhin a inlan dawn.
Thawhtanni zan khan Guwahati, Assam-a Vivanta Hotel-ah Board of Control for Cricket in India (BCCI) 2025-2026 season hawnna tournament, an hnuaia zone parukte inelna tur, Duleep Trophy-a North East Zone aiawh tur player-te thlan niin Dawrpui Vengthar, Aizawl tlangval hi a tel.
North East Zone-ah hian hmarchhak state paruk – Meghalaya, Mizoram, Nagaland, Manipur, Arunachal Pradesh leh Sikkim Cricket Association te awmin chief selector kal khawmten player hi an thlang a. Cricket Assoction of Mizoram (CAM) aiawhin Senior Men’s Selection Committee Chairman Joseph Lalhriatpuia pawh a tel.
Wicketkeeper-batter Jehu-a hi Chhinga Veng Cricket Club-a khel lai a ni a, ani bakah hian stand by-ah Luangmual Cricket Club-a khel, Bobby Zothansanga thlan a ni a. Team hi Rajkumar Jaishi, Falkland Veng, Aizawlin manager niin a enkawl ang.
Kum 25 mi, Jehu-a hi zone hrang hrangte limited over-a an inelna, Deodhar Trophy-ah kum 2023 khan North East Zone tan a lo inlan tawh a. Nikumah Duleep Trophy-ah hian a lo inlan tawh bawk.
Duleep Trophy-ah hian kum 2023 khan all-rounder Joseph Lalthankhuma, Ramhlun Venglai, Aizawl chu North East Zone team tan lo inlan tawhin Mizo zinga he inelna sanga inlan hmasa ber a ni nghe nghe.
Duleep Trophy 2025-26 hi August 28 atanga khelh tan tur niin North East Zone hian BCCI Centre of Excellence Ground 2, Bangalore-ah Central Zone an hmachhawn dawn a. Inkhel pakhat hi ni li chhunga khelh zawh hman tur a ni a, kan hriat thiam dan tur chuan Test ang chi niin team khatin thawh (innings) hnih zel an nei dawn a ni.
September 11-a final khelh tura ruahman inelnaah hian India captain Gill bakah India player pawimawh tak tak – Yashasvi Jaiswal, Shardul Thakur, Kuldeep Yadav leh Arshdeep Singh te pawh anmahni zone tan an inlan dawn a ni.
NORTH EAST ZONE:
Techi Doria, Arunachal Pradesh
Yumnam Karnajit, Manipur
Sedezhalie Rupero, Nagaland
Ashish Thapa, Sikkim
Hem Bahadur Chetri, Nagaland
Jehu Anderson, Mizoram
Arpit Subash Bhatewara, Meghalaya
Pheiroijam Jotin Singh, Manipur
Palzor Tamang, Sikkim
Jonathan Rongsen (Captain), Nagaland
Ankur Malik, Sikkim
Akash Kumar Choudhary (V/Captain), Meghalaya
Bishworjit Singh Konthoujam, Manipur
Aryan Borah, Meghalaya
Lamabam Ajay Singh, Manipur
STAND BY:
Kamsha Yangfo, Arunachal Pradesh
Rajkumar Rex Singh, Manipur
Bobby Zothansanga, Mizoram
Dippu Sangma, Meghalaya
Pukhrambam Prafullomani Singh, Manipur
Lee Yong Lepcha, Sikkim
Imliwati Lemtur, Nagaland
Anant Rangarao (Coach), Arunachal Pradesh
Sonam Palden Bhutia (Asst. Coach), Sikkim
Mowalong Kichu (Physio), Nagaland
Vikash Singh Chauhan (Trainer), Meghalaya
Ngangbam Maheshkumar Singh (Masseur), Manipur
Raj Kumar Jaishi (Manager), Mizoram