Aizawl: Chief Minister Lalduhoma chuan Mizoram chu HIV/AIDS inven dan kawnga inzirtirna nei tha, zawm tha si lo state angin a lang mek niin a sawi.
Thawhlehni khan HIV/AIDS darh zel tur venna beihpui thlakna, Intensified IEC Campaign hawnna inkhawm chu I&PR Auditorium, Aizawl-ah neih a ni a. Khuallian, Chief Minister Lalduhoma chuan HIV hi kai tawh chuan a tihdamna a awm lo tih sawiin, “A laka himna awmchhun chu inven chauh hi a ni. Inveng thiam tur chuan a chungchang kan hriat a ngai a, uar taka kan inzirtir a tul hle,” tiin, he natna hi hmun tinah a awm tawh avangin thingtlang leh hmun kilkhawr zawk thleng phak ngeia hma lak a tul thu a sawi.
Chief minister chuan Mizoram hi HIV/AIDS inven dan awareness nei tha pawl tak ni mah se, HIV kai an tam viau lawi si. Awareness nei tha, zawm tha si lo state angin a lang mek tih sawiin, “Hmalakna awmze nei, zawm hlawh lehzual awareness kan ngaihtuahchhuah a tul,” a ti.
Health Minister Lalrinpuii pawhin thu sawiin Mizoram chu HIV/AIDS hluar em emna a la ni zel a. Campaign uar zawka neih a la tul tih a sawi a. A darh chhan bul ber hi sex leh ruihhlo ni mah se vanduaina vangin mi fel tak takte pawhin an kai palh thei tih sawiin, “Natna pakhat anga ngai a, kan dinhmun kan inhriat chian vat zel a pawimawh,” tiin, campaign hlawhtling tak a nih theih nan mipui thawhpuina a ngen.
Intensified IEC Campaign chhung hian district 11-a khaw 88 tuam chhuah a ni ang a. A tam thei ang ber test neih hman tum a ni bawk.
HIV/AIDS darh zel tur venna beihpui thlakna hawnna inkhawmah hian MSACS Project Director Dr. Jane Rinsangi Ralte-in HIV/AIDS-a Mizoram dinhmun tlangpui a tar lan danin kum 1990 atanga nimin thlenga Mizorama HIV kai tawh hi mi 32,994 an awm.
Kum 2024-25 chhunga kai thar hi mi 2,471 niin, an zinga 1,602 hi mipa an ni a, hmeichhia 869 an awm a, 140 hi nau pai an ni.
A kai zawng zawng zaa 97 hi chu inven theih a ni a. Mizoram chu India rama HIV/AIDS venna leh enkawlna lam thawk tha ber pangna a nih mek.