Aizawl: Khuarel chhiatna hmachhawn dan chungchangte belchiang tur leh a tul anga hmalak dan turte rel tura Mizoram zin mek, National Disaster Management Authority (NDMA) hotute leh District Disaster Management Authority Aizawl leh Lunglei hotute chu nimin khan an inkawm.
Aizawla Royale Lalawi Hotel, Conference Hall-a an inkawmna hi DDM Aizawl district Chairman Er. Lalhriatpuia, Bawrhsap chuan kaihruaiin, Aizawl district-in chhiat rupna a hmachhawn dan tlangpui a sawi fiah a ni.
NDMA Joint Adviser Dr. SK Jena chuan Mizoram an tlawh chhan chu DDMA-te hi chhiatrupna a lo thlen changa lo hmachhawn hmasatu an nih avangin, chhiatrupna hmachhawn dan te leh an tun dinhmun te, Disaster Management Plan (DDMP) thlirletna leh an update dan te, NDMA-in DDMA te tichak lehzual tura an chak lohna lai te hriat te hriat an duh vangte a nih thu a sawi.
NDMA hnuaia chhiatrupna kaihhnawih scheme thar hrang hrangte, Standard Operating Procedures (SOPs) leh inkaihhruaina siam tharte inhrilhhriat nante leh chhiatrupna lo thleng tawh an hmachhawn dante, a pumpelh tura an inpuahchahnate, chhiatrupnain harsatna a thlente tihziaawm tura hma an lak dan te hriat a, an tihdan tha laite atangin India ram hmun dangte tan zirtur a awm em? Hmasawn ngaihna lai an nei em? tihte hre tura tlawh an nih thu a sawi bawk.
NDMA hotute hi Joint Adviser Dr. SK Jena, Asst. Financial Advisor Pranava Kumar leh Sr. Consulatant Rajan Kumar Borah NDMA te an ni.