Bairabi leh Sairang rel kawngin a tan tlanga ram nei, zangnadawmna la ve loten tun thla chhunga an dawng lo a nih chuan an ram chin hung an tum thu an sawi.
Thawhlehni khan Aizawl Press Club-ah thu thar thehdarhtute kawmin, Sairang rel kawng hawn mai tawh tura ram nei, zangnadawmna la ve lo 14-te chuan tun thla chhunga an pawisa lak tur ang an dawng lo a nih chuan an ram chin hung an tum thu an sawi a. Zangnadawmna la lo ram neitute chuan an ram chin an hung tur thu hi Aizawl DC leh railways minister bakah prime minister hnenah thlen an tum tih a sawi.
Zangnadawmna dawng lo ram neitute chuan zangnadawmna an la dawn loh chungchangah railways dawrin Delhi leh Guwahati-ah tum thum ve ve an kal tawh tih an sawi a. Aizawl DC leh railways lam chu an pawisa dawn tur chungchangah hian an inpuhtawn tih an sawi a, pawisa hi an pe thei lo a nih chuan pawisa an pekte ramah rel kawng chu suan mai se an duh thu an sawi.
An sawi danin mi 14-te sum dawn tur hi Rs 14,56,29,759 a ni a. Rel kawng hi August 18, 2011-ah survey neih tan niin kum 2016 khan zangnadawmna hi a dawngte chu pek zawh an ni a. Tuna la dawng lo mi 14-te zingah hian mi pali chu cheng khat mah la dawng lo an ni a, a then hi chu an dawn tur zat la dawng lote an ni.
Aizawl DC chuan he zangnadawmna an dawn tur ang la dawng lote hi a kokhawm tawh a, inbiaknate pawh an nei a. August 19, 2025 hian an ram chu spot verification tihthatsak tura thutlukna siam a ni a; mahse, dan pangngai anga file a kal leh a nih chuan kum 2/3 vel a ngai leh dawn a, rel a rawn luh tawh dawn bawk si avangin an ngaihthah an hlauh thu an sawi bawk.