Khawvel hmasawnna a sang zel a, kan zalen tawh em avangin buai awmzia kan hre lo chho telh telh a, kan nunphung hi a nih dan tur ve rengah kan ngai ni ber tawhin a lang.
Hmasawnna ke pen rualin kan che ve a, kan tawn tur ve rengah kan ngai a, engthil mah hi a hlutzia kan hre tak tak tawh lo ni berin a lang.
India in British awpna hnuaia zalenna a neih champha kan lo thleng leh dawn ta a, mahni kea ding tura zalenna a neih ni hi a hlu a, kan hlut tur pawh a ni. Chawlh satliah ang mai maia kan ngai chho ta hi a pawi viau.
Kan ram ngei pawh kan lo buai tawh a, kan pi leh pute kha tuboh leh dolung inkara awmin, ralti reng rengin an hun an hmang a, mahse vawiin a kan nun a zalen a, a ralmuang theih nan an lo thawk a ni zawk si.
India ram pawhin mahni kea ding turin zalenna a hmu a, hemi sualchhuak tura Gandhi-a ho a an beihnate kha a ropuiin, a zahawm asin. Tunah phei chuan khawvela ram zalen (democracy) lian ber kan ni ta.
Chawlh satliah ang mai maiin he ni hi hmang lo ila, thiltha tih nan, midangte tanpui nan, kan nun dan tha zawng zawng inzirtir thar leh thin nan hmang thei ila duhthusam a va ni em.