Aizawl: Land Revenue & Settlement Minister B. Lalchhanzova’n India ram hmun dang kalphung angin, Bawrhsapte chu revenue inrelbawlnaah thuneihna lian zawk pek an duh thu a sawi.
Nimin khan Revenue Minister B Lalchhanzova’n Khawzawl Deputy Commissioner-a Revenue Branch chu mipui te dawr theih tura hawngin, he hun hi Tuichang bialtu MLA W. Chhuanawma leh Khawzawl Bawrhsap te pai chhuah a ni tih sawiin, an ngaihven avang leh an vei vang a ni tih a sawi a, an chungah lawmthu a sawi.
Revenue Department chu a tul anga thuam chak zel a nih thu sawiin, tunah hian surveyor 14 lakna an tihfel thawkhat thu leh a dang 30 lakna turin sorkar atanga phalna hmuh fel a ni tawh a, thawktu dang pawh eng emaw zat lak tuma an inbuatsaih mek thu a sawi.
Revenue minister chuan India ram hmun danga an tih angin, Deputy Commissioner-te chu revenue inrelbawlnaah thuneihna lian zawk pek an duh thu sawiin, “Hei hian thuneihna semzai lam a kawk a, tun hmaa Secretariat leh Directorate a lehkha thawn ngai leh phalna lak ngai tam tak chu DC kutah thuneihna pek a ni zel hian a tichiang a ni,” tiin, Khawzawl mipuiin Champhai pan kher ngai lovin an district-ah hna tul zawng zawng an ti thei tawh tur chu a lawmpui thu a sawi bawk.
DC Khawzawl Revenue Branch-ah hian thawktu Settlement Officer, Surveyor, Revenue Assistant leh Peon pakhat theuh an awm mek a. DC office atangin UDC leh LDC pakhatin an pui hrih dawn a ni.