An inneihna kum em pawh a la vei lo mai ni lovin, thla thum a liam awrh chauh a, Maroon 5 bassist hlui Mickey Madden nupui Catherine Blair Bowman chuan a pasal lak atanga tisa taka beihna a tawh avangin inthenna a thehlut.
August ni 12 khan Los Angeles County Superior Court-ah a document neih ang angte thehlutin, a pasal then a duhna chhan chu inremna loh lian tak awm vang niin a sawi.
Anni pahnih hi May 6, 2025 a innei chauh kha an ni a, mahse Bowman chuan an pa phone a check sakna lamah hmeichhe tleirawl pakhat nen inzawmna thuk tak an lo nei tawh tih hmuchhuakin, an inkar pawh a nghetin, an inpawh hle tih a hmuchhuak niin a sawi bawk.
An inbiakna thenkhatah phei chuan sexy tak taka thlalak leh inbiakna a tam hle niin a sawi a, a rilru a nat thu leh a buai thu bakah, an inkar thilthleng erawh a hriatthiam hram hram a ngaih thu a sawi a ni.
Tin, Bowman sawi danin Madden-a hian a phone chhuhsak a tumna lamah a kut man betin, che thei lova a siam thu a sawi a, thinrim inhrikthlak nan a hman zui thu a sawi.
Madden hian kum 2020 khan an chhungkaw lam buaina avangin Maroon 5 a lo chhuahsan tawh a, hemi kum vek June thlaah thil tisuala puh nia man niin, $50,000 chawitir a ni a, kum 2016 khan New York-ah cocaine vanga man a lo tawk tawh bawk.
An nupa inthen leh buaina thleng zui hrang hrang chungchangah hian Madden te lam hi chuan thuchhuah engmah an siam hriat a la ni lo a, an nupa erawh inthenna an tifel tawh nia tarlan an ni.