Aizawl: BJP Mizoram President Dr K Beichhua, MLA, chuan BJP Mizoram chu mipuiin an ngaizawng tan mek tih a sawi.
Inrinni khan BJP Mizoram chuan Upper Republic-a an party pisa-ah party kalphung leh inrelbawl dan chungchang inzirtirna leh infuihtharna workship an nei. State President Dr K Beichhua chuan BJP Mizoram chu mipuiin an ngaizawng tan mek a, chak taka party a kal zel theih nan thawhhona tha leh inpumkhatna tha an neih a pawimawh tih a sawi.
Siaha bialtu MLA Dr K Beichhua chuan, “BJP chu party lian tak kan ni a, kan inrelbawlna hi zir tham a niin, party-a nihna chanvo hi lal anga rorelna tur ni lo vin, kan hnathawhna hmanrua mai chauh a ni,” a ti a. Tun hmain Mizoramah BJP nih zahthlak khawpin mipuiin an endawng a; mahse, hetiang laia meichher lo chhi engtute, Mizorama BJP hruaitu hmasate an zahawmin an fak awm en em a, tunah erawh chuan chutiang dinhmun chu an kalpel tawh a, chumai nilovin, Mizoramin kawng hrang hranga harsatna a tawh mekah pawh Pathianin BJP chu Zoram khaichhuaktu atan a hman ngei a beisei tih a sawi bawk.
Workshop hawnna inkhawmah hian National level-a Mizoram enkawltu, Devesh Kumar chuan national, state leh tualchhung level a party kalphung leh inkaihhruaina hrang hrang sawifiahin, party mite chuan pawl kalphung leh inrelbawldan hriatchian a pawimawh thu a sawi a. BJP chuan social media chanchin thehdarhna atan an chhawr tangkai thu leh mipui chanvo tur leh hmasawnna tur atana sorkar scheme hrang hrangte mipuite hrilhfiahna atan an hmang thin tih a sawi.