Aizawl: August ni 19, 2025 chhuna Runliani (kum 80) Maubawk Aizawl, an chenna in a thattu nia puh, Vanlalmuanchhana (21) s/o Zairemmawii, Maubawk Bethel Veng, Aizawl chu Inrinni tlai khan Aizawl Police ten an chenna inah an man.

Vanlalmuanchhana hi Inrinni tlai khan a inpuang a, a inpuan ni la la, zan dar 9 khan Central Jail-ah dah luh nghal a ni.

Maubawk venga tualthahna hi police-in ngawrh taka chhuiin rinhlelh eng emaw zat pawh an la a, rinhlelh thente chu darkar 72 kawl an nih hnuah ni 10 dang court-ah remand dil belh a ni.

Hetiang a nih lai hian rinhlelh zinga tel lo, Vanlalmuanchhana hi man a ni ta a, Runliani te in atanga hla vak loa awm niin, Runliani dawr bag Inrinnia an hmuhchhuah chhui zuina atanga man a ni.

A thah ngei a nih thu pawh police hnenah a inpuang a, a inpuanna mai bakah an hnuchhuina nen a chet dan hi a inhne rem thlap nia sawi a ni a, a pawisa lak Rs 2,000 chuang atanga a hman bâng pawh police hian an hmu let a ni.

Hetih lai hian, Maubawk Seventh day Adventist Church Women’s Ministries te chuan Inrinni chawhnu dar 2 khan Maubawk Kawn-ah Mual Inkhawm neiin upate chunga hleilenna thleng thin duh lohna an lan tir.

An venga awm phal lo

Maubawk khawtlang chuan thuchhuah siamin, Runliani (Pi Luti), kum 80, thihna chungchangah tualthattu chu an veng chhunga awm zui an rem tih tawh loh thu an tar lang.

Inrinnia an thuchhuahah Maubawk khawtlang chuan, August ni 19, 2025-a Runliani (Pi Luti) rawng taka thattu Vanlalmuanchhana (21) s/o Zairemmawii man chhuah ani chu lawmawm an tih thu tar langin, theihtawp chhuahtu Mizoram Police-te thawhrimnaah lawmthu an sawi a. Tualthattu Vanlalmuanchhana, Maubawk Kawn veng (Vanapa Section) chu a phu tawk ang ngeiin na taka hrem an phut a, tualthattu hi man chhuah anih atang hian Maubawk Veng chhungah a awm zui an rem tih tawh loh thu an tar lang.