Aizawl: MNF Vice President Lalchhandama Ralte chuan chief minister-in minister/MLA-te tan tlawn loh theih loha inhung tawhin, tunah chuan Super CM a ni mek tawh tih a sawi.
Thawhtannia Mizo Hnam Run inkhawmah Leader of Opposition ni bawk, Lalchhandama Ralte chuan, Independence Day-a chief minister Lalduhoma thusawiah thudik zik tluak lo leh zirtirna dik lo a tam hle tih sawiin, “I-Day heti zat kan hman tawhah CM-ten kalphung awmsa hmangin – inlawmna te, hnam pasaltha zahnate, state hmasawnnate, chona hmachhawpte, future vision-te, inpumkhatna leh tanrualna thute an sawi thin. A thusawi dan kha a dangdai hle a, keimah ngeiin ka buatsaih a tihte hi a dik em? Zawhna lian tak a awm a ni,” a ti.
Lalchhandama Ralte chuan, “Pu Duhoma’n leiba Rs vbc 13,584.80 neiin bul kan tan, tia a sawi kha ZPM sorkar hma kum 2023-24 BE figure a ni. RE-ah Rs vbc 12,709.29 a ni zawk (hei hi GSDP atangin 32.29% a ni). Finance Commission 15-nain leiba neih a phal chin bituk (33.1%) aiin a hniam,” tiin, kum 2024-25-a ZPM sorkar budget pharh hmasa berah leiba zat chu Rs vbc 14,034.76 a ni – RE-ah 38.32% of GSDP a ni. Hei hi FC 15-nain leiba neih a phal chin (32.8%) a khum hial zawk niin a sawi.
ZPM sorkar chu puk ve lo tura an insawi laiin, an sorkar tuk atanga kumin June thla thleng (thla 19 chhung) khan source hrang hrang atangin Rs vbc 6214.27 an puk tawh tih sawiin Lalchhandama Ralte chuan, “2023 (Dec)-ah Rs vbc 378.38, kum 2024 chhungin Rs vbc 4301.88 (puk theih zat Rs vbc 1037) leh kum 2025 (upto June)-ah Rs vbc 1534.01 (puk theih zat Rs vbc 1,807) an puk tawh a ni,” tiin, kum kal mekah hian an puk theih zat atangin 84.89% an puk tawh tih a sawi.
Leader of Opposition chuan ZPM sorkar chu Year of consolidation an puang chungin, an puk nasat lutuk avangin Covid-19 (2021–22) lai tih lovah chuan ‘revenue deficit’ hial a thleng,” tia sawiin, kum 2007-08 hnu lamah revenue deficit a la awm ngai loh thu leh financial management thiam, puk ve dawn lo titute hian an puk hnem tih a sawi.
Contract hna departmental works thawh leh restricted tender chungchangah pawh hmanni lawka blanket approval Rs vbc 629.17 an pekte kha ti ve lo tura intiamte hian sum bawm an zen nasa fe zawk tih a tichiang hle tih sawiin Lalchhandama Ralte chuan, “CM hian PMJVK, Tax-Finance, District Council, CSR zawng zawng a hnuaiah a lakhawm vek a. Minister/MLA-te tan tlawn loh theih lohin a inhung tawh a, tunah chuan Super CM a ni mek tawh a ni,” a ti.