US President Donald Trump-a chuan Thawhtanni khan North Korean hruaitu, Kim Jong Un-a nen kuminah an inkawm leh ngei a beisei tih a sawi a. Hetih lai hian White House-ah South Korean president nen an inkawm bawk.
President Lee Jae Myung-a’n White House a thlen hma lawkin Trump-a hian social media-ah South Korea-in biak in a luhchhuah thin a dem thu a tar lang bawk.
Oval Office-a minute 40 chhung an inkawmah hian Lee-a chuan Trump-a hi fak mah se US hruaitu hian a lawm vak lo va. North Korea nena inang rengah puhin palaia inbiak aia buaina duh zawk angah a chhuah.
Trump-a hian a president hmasak khan Kim-a hi vawi thum a hmu a, ‘mi dangte aia tha, a farnu ang deuhthaw’ niin a sawi zui nghe nghe.
“Kan la inhmu leh ang, inhmuh ka duh hle a. Kei nen chuan kan inkar a tha hle a ni,” tiin Trump-a hian thuthar lakhawmtute hmaah sawiin kuminah pawh a ni thei tih a sawi bawk.
Trump-a’n January 20-a pisa a luah leh atangin North Korea hian rocket eng emaw zat a kap leh tawh.
President hian indona pasarih a ching fel leh tawh niin a insawi a, hei hi awih lo erawh an awm a, kum 2017-21 chhunga a hun hmasaa inbe fo ni chungin a hun tharah hian North Korea chungchangah thawm a la nei lo hle thung.
Vawi khat chu Trump-a hian Kim-a nen hian an ‘inhmangaih’ tih a sawi tawh a. An inkawm khan an inkar khi tak a tinep hle a; mahse, inremna erawh an siam thei lo.
Pyongyang hian Trump-a’n thuneihna a chan leh hmaa president, Joe Biden-a kha an lawm lo hle a, hei hi Trump-a chuan zah lo taka Kim-a a chet khum vangah a puh.
Kim-a hian Trump-a’n tihtawp a tum mek, Ukraine-a indonaah Russia puiin a sipai pawh sang chuang a tir a. Nuclear ralthuam siam lo tura tihna pawh zah lovin a buaipui reng bawk.
Trump-a nena an inkawmnaah hian South Korean President Lee-a pawhin Kim-a nen hian inbiak a duh thu a sawi a. “Chairman Kim Jong Un-a ena inbiak hi ka duh a, North Korea-ah Trump Tower sain golf pawh kan la khel dun ang,” tiin a sawi a ni.
Lee-a hi June thlaa Yoon Suk Yeol-a paih thlak a nih hnua thlan tlin a ni a. Trump-a hmun luhchhuaha a puhna hi Yoon-a thawhpuite an zawnnaa an chetna zawk a nih thu a sawi.