Lirnghing na takin a sawi hnu ni hnihah Afghanistan khawchhak chu magnitude 5.2-a na nghing nawnin a sawi leh a. Mi 1,400 chuang thi awm tawhin mi 3,000 velin hliam an tuar tawh bawk niin Taliban sorkarin a sawi.
Pathiannia magnitude 6.0-a na lirnghingah chhanchhuah hna thawh chu lei minin kawngpui a dan nasa avanga inkalpawh a harsatn avangin a chak hlei thei lo.
Thingtlang kilkhawr tak taka dam chhuakte zawn hna chu helicopter hmanga thawh niin in chim karah mi tam tak an tan rin a ni.
Russia chauhvin a la pawm Taliban sorkar chuan ram dang puiha a dil a. UN chuan hman turin pawisa a pe tawh a, UK pawhin £ maktaduai 1 pek a tum bawk.
Afghanistan hi lirnghing thlen duhna tak ram ni mah se Pathiannia thleng erawh tun hnai kum eng emaw ti chhunga a na ber pawl a tling.
Thawhlehni khan chhun dar 12:29 (India-a chhun dar 01:29)-ah an ram khawpui lian ber pangana, Jalalabad atanga km 34 vela hla atanga intanin a nghing leh tih US Geological Survey (USGS) chuan a sawi a. Lei hnuai km 10 leka thuk atanga intan a ni.
Nghing nawnah hian tumah thi leh thil tihchhiat thar a neih hriat a ni lo.
Lirnghing tuar na ber, thi leh hliam pawh an tamna ber, Kunar province-a khaw kilkhawr tak tak atangin helicopter hmangin dam chhuakte phurh chhuah an ni.
Hmun thenkhat chu a awih em em hlawm a. Mazar valley an tihah phei chuan helicopter pakhat chu vawi thum tum a tumah a hlawhchham vek niin Taliban-in an sawi.
Tanpuitu pawl, Save the Children chuan Kunar province-ah hian dam chhuak leh chhanchhuah hna thawktute tan damdawi a thawn a, mi sang telin tui, ei tur leh awmna an mamawh nghal bawk.
Médecins Sans Frontières (MSF) pawhin an team-ten damdawi in pahnih, Nangarhar province leh Laghman province-a mi an thleng tawh tih an sawi.
Afghanistan hian tun hnaiah khawkheng nasa tak tawkin an mangan hle laiin lir a nghing zui a, UN chuan tam an tam hle tih a sawi.
US-in kuminah ram danga puihna a pek thin tam tak a tihtawp avangin Afghanistan pawh hian an dawn tlem phah hle a, chhiatna an tawh zui leh bawk avangin an tawrh a thuah hnih hle.
India chuan Kabul-ah puanin 1,000 a thawn tawh a, Kabul atangin Kunar province-ah hian ei tur tonne 15 a thawn tawh bawk tih Delhi-a foreign minister chuan a sawi.