Assam nen ramri buai kan nei leh thin a, hun hmasa lamah kan inkalpawhna kawngpui berte kharin, harsatna kan lo tawk tawh a, kan thenawm state dangte nena kan inkalpawhna kawngpuite kan ngaihthahzia a lang tawh thin.
Hetiang thil hi tawng leh thut thei kan ni tih hriain kan kawngpuite hi cheithat a, siamthat thuai thuai a va tha thin tak em.
Assam buaina avanga kan chak lakna kawngpui dan sak kan nite kha a tlawm thlak a, kawng dang zawng miah lo kan ang zawk hial a nih kha.
Tunah hian chet la tan ila, kan tawrhna atangin inzir fing ila, min pawhtu state thenawm dang kawngpuite hi siam thuai thuai ila, ramchhung kawngpui kan siam rual hian hengte hi hna hmasa a ni tih i hre thar zel teh ang u.
Kan ramchhung kawngpuite hian siam that thuai thuai an phu tawh a, lirtheia eizawngte an khawngaihthlak a, kan siamthat pah hian chak lakna kawng dang atan kan hmang thut thei tih hrereng chungin kan kawngpui neih dangte pawh hi chei hnum mawlh teh ang u.
Buaina leh harsatna kan tawh loh hi chuan kan ngaihsak lovin kan vei lo khawp thin a, harsatna kan tawh chiah hian kan fin hi a lo tlai leh thin lai a pawi a, kan tawrhna atanga inzir fing chungin kawngpui tha nei tura chet lak a hun e.