Aizawl: Ministry of Home Affairs (MHA) hmalakna hnuaia Border Security Force (BSF) ruahman, Bharat Darshan Tour hmanga Delhi kal turte chu nimin khan Raj Bhavan atangin Larsap General Vijay Kumar Singh chuan a vai liam.
Tun tum Bharat Darshan Tour atan hian district pali – Aizawl, Lunglei, Mamit leh Saitual district-a sikul pariat atangin zirlai 100 leh zirtirtu pariatte thlan chhuah an ni a. September 3-8, 2025 chhungin Delhi-a cultural & heritage site-te, sorkar office leh museum-te bakah hmun hrang hrang an tlawh ang.
Larsap General Singh chuan sorkar laipui Ministry of Home Affairs leh BSF hmalakna hnuaia Mizoram naupang 100 leh zirtirtu pariatte tan Bharat Darshan Tour buatsaih a ni chu lawmawm a tih thu a sawi a. Tour ruahman chu thil hautak leh ngaihtuah tur a tam thu sawiin, a hlawhtlin theih nana MHA, BSF leh buaipui dangte hmalakna fakawm a tih thu a sawi.
India chu ram zau tak, hnam ziarang, tawng bakah mi hrang hrang awmna ni mah se, ram inpumkhat leh inlungrual tak an ni tih sawiin larsap chuan, Bharat Darshan Tour-a kal tur zirlaite chu zirlaibu a chuang chiah lo thil tam tak an zir tel dawn avangin uluk taka ngaihvena thil thar zir chhuah tum tlat tur leh Mizoram tana hmasawn thil eng emaw tal hawn theuh tum turin a chah.
Vai liam inkhawmah hian Ahsan Sahedi, DIG (G), Frontier HQ BSF, Silchar leh AK Sharma, Commandant (Adm), Sector HQ BSF, Aizawl ten thu an sawi bawk.