Mizoram Board of School Education buatsaih Higher Secondary School Leaving Certificate (HSSLC) Examination 2022 chu nimin atangin tan a ni a, zirlai naupang 20-in Covid-19 an kai avangin an exam thei rih lo.
Zirlaite chu sikul chhunga an luh hmain an khua a sik leh sik loh endik an ni a, thutthleng pakhatah mi pahnih zel thuttir an ni.
The Zozam Times zawhna chhangin MBSE Chairman JH Zoremthanga chuan HSSLC examination chu sorkarin hri laka mipui himna tur inkaihhruaina a siamte zawm chhunga kalpui a nih thu a sawi.
HSSLC exam bei tur zingah naupang 20-in Covid-19 an kai avangin exam bul an tan ve thei lo tih sawiin, an dam vel leh exam an chhunzawm ang a, an damloh laia exam kalpui tawhte chu hun remchangah exam-tir an ni dawn tih leh exam bul tan niah exam tibuai thei harsatna a thlen loh thu a sawi.
HSSLC examination hi March 1 atanga 25 chhung neih tur a ni a, exam centre 90 awmin, candidate 12,301 an awm a ni.
Thawhtanni khan High School Leaving Certificate (HSLC) Examination 2022 chu centre 117-ah tan a ni tawh bawk a, candidate 18,357 awmin mi 51-in Covid-19 an kai avangin an exam thei rih lo a, an dam hunah exam hi an chhunzawm leh dawn a ni.