- Rinfela Zadeng
Kan ram rorelnaah ‘Bye Bye’ in kan rilru a tinâ a; Ukraine laka Russia ram chêt danin khawvel rilru a tina bawk a. Tun tumah hian Kristiante hian ram leh hnam hmangaihna kawngah kan tih tur leh kan mawhphurhna te hi Bible behchhanin thiam lo takin kan zir dawn a ni.
Ram neitu Pathian
Genesis kan chhiar chuan khawvel leh a chhunga thil awm zawng zawng hi Pathian siam a ni a, enkawl turin mihringte hi mawhphurhna min pe tih kan hmu. Pathianin a thilsiam te chu tha a ti em em tih kan hmu bawk a; chung chu enkawla vawn him hi Pathianin mihring a siam chhan pakhat a ni a. Kan khawvel hman mek hi Sakhaw thil emaw Politics zawngin a ni emaw, ei leh bar kawng a ni emaw, kan chhehvel boruak/environment zawngin a ni emaw, ?ha taka enkawl leh venhim hi Pathianin mihring a siam chhan bulpui, kan mawhphurhna tura a dah a ni tih Bible a?angin kan hmu.
Roreltute leh Zawlneite
Thuthlung Hlui huna Pathianin roreltute leh zawlnei a ruat te khan ram leh hnam an hmangaihin, ram rorelna ?ha a awm theihna tur te, ram leh hnam hmangaihna rilru kha mipuite’n an neih reng theihna turin an inrawlh thukin Pathianin thuchah pawh a puan tirin hna a thawh tir thin tih kan hmu.
Hruaitu ropui Mosia khan Israel hnamte kha a hmangaih tlat avangin Pathianin Aigupta ram a?anga Kanaan ram an panna kawnga an sualna leh luhlulna avanga tihboral vek a tum khan Isarel hnam an boral lohna turin Pathian kha a ngen tih kan hmu (Deut. 9:6-26). Nehemia chu ram dangah nuamsa taka Lal no hlantu a nih laiin a pianna ram khawpui Jerusalem kulh tlabal tak leh a kawngkhar kang te chuan a rilltu a tinain a tap tih kan hmu a (Neh 1:4). Lal Artazerzia hnenah khan Jerusalem kulh din thar leh turin Jerusalema kal a dil tih kan hmu a nih kha. Lalnu Estheri leh Mordekaia te pawh khan an chipui Juda te nunna chu an chhan tih kan hmu bawk. Daniela chuan an sualna avanga Israel ram leh hnam tluchhe tawh chu tundina a awm leh theihna turin Pathian hnenah chawngheia saiip puan sinin a tawngtai tih kan hmu bawk (Dan 19:1-19). Heng kan sawi bakah hian zawlnei Jeremia, Amosa, Mika adt te pawh kha ram leh hnam tun dina a awm leh theihna turin theih tawp an chhuah tih Bible-ah chiang takin kan hmu.
Israel te chu an sualna avanga hnam dangin an awpbehna atanga chhanchhuah kha roreltute hnathawh pui ber a ni tih Bible-ah kan hmu bawk. Othniela, Ehuda, Debori, Samsona adt te kha Pathianin hnam dang awpbehna laka Israel fate chhanchhuak tura a ruat te an ni.
Ram leh hnam hmangaihtu Lal Isua
Chanchin Tha Luka ziak bung 13:31-34 kan chhiar chuan Lal Isua chuan Jerusalem khawpui sualna kha a vei em em tih kan hmu a. ESV Global Study Bible-in a sawi dan chuan Jerusalem hian Israel hnam pumpui ai a awh a ni. Isarel te sualna avanga hremna an tawrh tur kha Lal Isua’n a hmuha a hriat khan a vei em em a ni. Lal Isua hian tisa leh thlarau thilah a lo pianna ram leh hnam Israel te sualna kha a veiin a manganpui tih chiang takin kan hmu thei awm e. Politics leh Sakhaw thil avanga Krawsa Lal Isua an khenbeha a thih dawnah pawh Pathian henah ngaihdam a dil sak tih kan hmu bawk (Lk 23:34).
Kan tih ve tur
Khawvel hmun dang chu kan sawi thei lo a; keini Mizote pawhin Mizoram tan hian tihtur leh mawhphurhna kan nei a, chu chu Pathian thuawihna a ni bawk. Mimal, kohhran leh Sorkara hotu kan nihna atangin leh Kristian kan nihna avang pawhin kan ram chhiat leh thatah hian mawhphurhna lian tak kan nei a ni.
Kan ram rorelna hi mipui te duthlanna vote hmanga siam a ni a, mi tha lo leh dik tawk lo hruaitu kan thlanchhuah chhung chuan kan phu tawk ram hruaitu kan nei tihna a ni. Zaah za chuan kan ram hruaitute hi an dik vek thei lo ang a, tihsual leh tihpalh tam tak an nei ang a; mipuite pawh kan tha famkim thei hauh lo ang. Chutih rual erawh chuan kuttling loa sum leh pai neih te, dikna tel loa ram rorelna kalpui reng te, mi rethei rahbehna sorkar te, sual zalenna sorkar te, kan chheh vel ram dangte aia hnu fual leh rethei renga awm ram leh hnam kan nih reng chuan kan mawhphurhna liau liau a ni.
Politics khawvelah kan sakhaw hruaitute leh keni zawng zawng hi zuang lutin rorelna fawng chelh tumin hma ila ang u tihna a ni lo a. Kan ram roreltu te hian dik taka ro an rel theihna turin mi tin te hian dikna leh rinawmna i nunpui hmasa ang u. Mi dik lo leh sum leh pai hmanga min thlem tu te hi hnawlin, Pathian thuawih chunga ram leh hnam hmangaihna tak tak rilru pu hruaitu i thlang chhuak ang u. Dik lo tak leh mahni inhai vurna atana ram hruaitu nih tum leh ni mek te hi hnawl ngam ila; dik lo ngam lo ram hruaitu an lo chhuak nghal ang.
Ram hruaitu dik lo, sum leh pai eiruknaa fimhlim lo nia kan hriat, sum dawnna atana ram hruaitu nih tum leh ni mek te kan nei a nih chuan a thlangtu mipuite hian kan rilru milpui leh kan duh tak hruaitu kan nei tihna a ni. Kan thawmaw hakin kan rilru a tarlang ang hian ram hruaitu kan neih te hi mipui rilru dik tak lan chhuahna a ni. Mi tha, mi dik leh ram leh hnam hmangaihtu tak tak, Pathian thu nena ram leh hnam hmasawnna duhtu kan nih chuan kan hruaitu thlan chhuah te hi an sual rei thei lo a, an sual ngam lo bawk ang.
Pathianin Mizoram min pe a, a chhiat leh a that thuah mawhphurhna min pe tel bawk a. Chu chu tihawlhtling turin nang leh kei hian mawhphurhna kan nei a ni.