President Donald Trump-a chuan US sipaite chuan ruihhlo tawlh phurtu lawng chu an kap tih a sawi a, hetah hian a chuang ‘mipa ruihhlo tawlhtu’ pathum an thi tih a sawi.
Trump-a chuan lawng hi kap turin thu a pe tih a sawi a, US intelligent-ten ruihhlo tawlh tur an phur ngei tih an finfiah hnuah heng lai viltu US Southern Command-in an kap a. Tun hnaia ruihhlo phur lawng pathum kahna a ni ta.
Trump-a chuan Zirtawpni khan Truth Social-ah tu ram mah ni lo tuipuiah kah a nih thu a tar lang a. US Southern Command hian South America leh Caribbean tuipui zau tak an vil a ni.
A hmaa Venezuela atanga chhuak lawng pahnih kahah mi 14 an lo thi tawh bawk.
Venezuelan President Nicolás Maduro chuan US sipaiten an beihna hi demin an ram chu US ‘nawrna lakah’ an veng dawn tih a sawi.
Trump-a chuan Zirtawpni zana an kah thu a puana video a dah chhuahah lawng hi tuipuiah kalin a hnu rei lo teah a puak a, mei a kang nghal hluah hluah bawk tih a lang.
“Thu ka pek angin Secretary of War chuan ruihhlo tawlhtu mi firfiak pawlte chu a mawh latu, USSOUTHCOM-in a kap,” tiin Trump-a chuan a tar lang a. “Intelligent-ten ruihhlo an phur tih an finfiah a, American-te hnenah hlan tur tûr hlauhawm tak an phur a ni,” a ti.
“US sipai tumah tuartu an awm lo va. AMERICA-AH FENTANYL, NARCOTIC, DAN LOVA RUIHHLO TAWLH TE, AMERICAN LAKA THARUM THAWH LEH FIRFIAKA CHETNA sim rawh u!!!” tiin a tar lang.