Tunlai chu social media-ah sorkar sawichhiatna leh duhkhawp lohna hmuh tur a tam hle mai a. A bik takin heng sawichhiatna hi kumin 2025 hian a tam lehzual ta. Sorkar lai party mi leh sa ten theih tawpin heng sawichhiatna leh beihna hi sawifiah tum mahse mipui an hneh lo niin a lang.
Kawng lehlamah chuan social media a inbeihna hi ZPM lo sorkar theihna a ni ti ila a dik thei tho ang. Sorkarna an chelh hma khan ZPM hi media-ah an chak em em a. Ruling party tan khan tawrh zawh rual lohin kiltin an luah kha a ni mai a. Sorkar chetna hlek kha an umphak vek emaw tih tur a ni a. Sorkar office lam document chi hrang hrang, mipui laka thup zawng zawng kha an rawn tarlang zung zung a. Nitina mipui ten kan hmuh chu sorkar dik lohna hlir a ni ringawt mai. Thil tha an tih pawh mipui tana pawi em em zawk angin an tarlang zo vek thei a, a lo inkaihhnawih leh vek thin si. Party mite chuan an party an chhan zo thlawt lova, inthlanah an tla ta nge nge a ni.
Media war hi tunlai democracy ram indona hmanraw pawimawh ber a ni a. Central lam leh state dangah pawh an politics hi social media war a ni deuh ber mai. Tunhnai chho a inthlanna a chak party te kha en let ila, media war a chak an ni ber mai. Khawvel ram dangteah pawh intlansiakna a ni bawk. Ram leh ramah pawh social media chu hmanraw pui ber a ni.
Kan ramah erawh social media hmang thiam apiang an kang zel dawn nia a lan lai hian mipui kan fimkhur a ngai hle mai. Social media pawm chin neih a ngai. Thlitfim thiam tum a tha. Kan chhiar leh hmuh apiang pawm duak duak ringawt hi bumna thang a awhna a ni thei tih kan hriat tel reng a ngai a ni.