Professional Football Association (PFA) chuan Raheem Sterling leh Axel Disasi an enkawl dan chungchangah Chelsea chu thu an zawtfiah a, boss Enzo Maresca-a’n thil awmzia a sawi fiah.
Sterling leh Disasi te hi Chelsea squad zingah an training lo chhunzawm zel a, tun nipui bazar inhawn lai khan bomb squad-ah tel mah se an hralh thei lo.
Zirtawpni zana thuthar lakhawmtute a kawmnaah Maresca chu Sterling leh Disasi chungchang zawh a ni a, “Ka pa hi kum 75 mi a ni a, kum 50 chhung sangha mantu a ni. Zing dar 02:00 atangin chawhma dar 10:00 thleng a thawk thin a, hei hi hna rim a ni a, player-te erawh an la hahdam lutuk,” a ti.
“Reheem leh Axel te dinhmunah hian ka inchan a, an rilru puthmang tur chu ka hriatthiampui. Senior team zinga training an duh ve ang a, inkhelh te pawh an duh ve ngei ang. Chutih laiin chhan hrang hrang avangin hetiang hian kan inenkawl a, club chuan hma an sawn theih nan an mamawh zawng zawng kan pe a ni.
“Chelsea mai ni lovin club hrang hrangah hetiang hi a thleng. Italy, Spain, England, France, USA leh Brazil-ah pawh, player leh club inkarah harsatna a awm thin a. Club chuan player te mamawh zawng zawng kan pe, squad-a an tel loh chuan a chhan a awm a ni mai a ni,” a ti.
Sterling hi Chelsea player zinga hlawh hnem ber a ni a, kar khat chhungin £300,000 vel a hlawh a. Maresca-a’n thla 15 Chelsea a enkawl chhungin Blues tan a inlan leh tawh lo va. Season liamta khan Arsenal-ah loan-in a kal a, tunah Chelsea-ah a kir leh.
Disasi pawh season hmasa chawhnu lam khan Aston Villa chu loan-in a zawm a, ani pawh Maresca-a hnuaiah hmun a chang lo mek a ni.