Aizawl: Muallianpui chuan kuminah vawk pul hri (ASF) vanga vawk a thih nasat avangin kuminah ‘Lo Zawh Lawm 2025’ chu khawtlangin ruai nen lo zawh lawmna an hmang thei lo.
Muallianpui khua chuan lo zawh lawm chu awmni khamin an hmang a, kuminah vawk pul hri (ASF) vanga vawk a thih nasa avangin tun tumah ruai nen lo zawh lawmna hi an hmang thei lo va. Sawhchiar nen erawh an lawm thei chu Pathian khawngaihna avang liau liau a ni tiin lawmawm a tih thu leh hlu a tih thu Muallianpui VCP HC Lallawmzuala chuan a sawi.
Kuminah Muallianpui khawtlang chuan buh kawt 3,347 thar an inbeisei thu leh buh bakah sawhthing, hmarcha, vaimim, chhawhchhi te pawh an thar nual dawn niin an VCP chuan a sawi a.
Muallianpui-ah chhungkaw 200 vel awmin, mihring 1,700 an khawsa mek a, kumin-ah lo nei chhungkaw 101 an awm a, buh tin 207 an tuh a, buh kawt 3,347 thar turah an inbeisei a. Kumin vek hian chhungkaw 105-in sawhthing an ching a, hmarcha chhing chhunkaw 95 an awm a, vaimim leh chhawhchhi ching chhungkaw 20 chuang ve ve an awm bawk.
VCP HC Lallawmzuala chuan an khawtlangah vawk pul hri a len avangin vaimim eitu vawk an awm tak loh avangin Agriculture Department chuan vaimim tharte an leisak dawn tih sawiin, Agriculture department chungah lawmthu a sawi a. Tun hmain serthlum an ching uar hle tih sawiin, a hlawkna an tel tan dawn chiah tihin kum 2021 khan serthlum a tam a, hei vang hian tun dinhmunah serthlum nei pawh an awm mumal tawh loh thute, serthlum thlakna atan dragon fruit leh coffee an chin bakah Tung an ching leh dawn tih a sawi.