Aizawl: DM&R Minister Prof Lalnilawma chuan, “Aizawl khawpuia khuarel chhiatna thleng tam ber hi keimahni fimkhur loh avanga kan thlentir a ni,” a ti.
He thu hi Thawhtannia DM&R department-in Mizoram State Emergency Operation Centre (SEOC) foundation lungphum phunna programme E-In-C, P&E Office, Conference Hall-a an buatsaihah DM&R Minister Prof. Lalnilawma’n a sawi a ni.
SEOC hawnna inkhawmah minister chuan, “Khuarel chhiatna kan tih hi khuarel a ni chiah em? Nge, keimahni thlenchawp (man-made) zawk? Mizoram, a bik takin Aizawl khawpuia khuarel chhiatna thleng tam ber hi, keimahni fimkhur loh avanga kan thlentir (man-made) a ni,” tiin, leilung chunga kutthlak dan hian chhiatrupna thlen kawngah kawngro a su hle tih hre thar a, bawlhhlawh leh tuichhe paih danah te, in sakna tura lei laih danah te mi tin fimkhur turin a chah.
DM&R Minister chuan Mizoramah chhiatrupna hi a thleng zing ve ta hle a, chhiatrupna a lo thlen changa rang taka district hrang hranga DEOC te hmalak dan lo monitor a, state level a ruahmanna siam ngai te lo siamna hmun chu SEOC a nih avangin a pawimawh hle tih a sawi a. SEOC changtlung tak an nei mai tur chu lawmawm a tih thu leh department tan chhinchhiah tlak a nih thu a sawi bawk.