Aizawl: Health Minister Lalrinpuii chuan Mizorama ramhmul damdawite humhalh nachang an hriat a, ram danga thawn chhuak thei khawpa an chin pun hunah nasa takin hma an sawn dawn tih a sawi.
National AYUSH Mission, Mizoram buatsaih, National Ayurveda Day 2025 lawmna chu nimin khan Vana pa hall-ah neih a ni. Kumin hi National Ayurveda Day lawm a nih tan atanga vawi 10-na niin, thupui atan, ‘Ayurveda for People and Planet’ tih hman a ni.
National Ayurveda Day 2025 lawmna inkhawmah khuallian chuan Ayurveda chu natna enkawlna mai ni lovin nunphung chi khat a ni a, a thu ril ber chu hriselna vawn him a nih thu leh tun laia nunphung hrisel lo avanga natna pung zelah a la pawimawh zual zel dawn tih a sawi.
Health minister chuan Mizoram leilung, sik leh sa leh ruah tui tlak dante chu thing leh mau, thlai leh ramhmul damdawi chi hrang hrangin an ngeih em em a. Heng ramhmul damdawi tangkai tak takte hi, humhalh nachang an hriat a, ram danga thawn chhuak thei khawpa an chinpun hunah phei chuan nasa takin hma an sawn dawn tih a sawi.
Lalrinpuii chuan Ayurveda chu India-in mihringte hnena a thilpek hlu tak a ni a, Ayurveda hmanga hriselna chu mi tin tan a ni a, hrisel taka nung duh apiang tana belhchian tlak, Ayurveda chu chawilara a awm zel a beisei thu a sawi bawk.
Khuallian chuan sorkar laipuiin AYUSH lama hmasawnna a dah pawimawh thu a sawiin, “Central sorkarin India damdawi dan a nih avangin Ayurveda hmasawnna hi a dah pawimawh a, research, zirtirna, hmasawnna leh damdawi hlo enkawlna atan sum a pe zel a ni,” a ti.