Palak bialtu MLA K. Hrahmo chuan India ram pumah GST tihhniam a ni chu ram mipuite tan malsawmna a ni a, Mizoram bik phei chuan Sairang thleng rel a lut ta bawk nen, malsawmna thuah hnih a dawng tih a sawi.
Thawhlehni khan Aizawl Press Club-ah thu thar thehdarhtute kawmin BJP MLA chuan kumin Independence Day-ah Prime Minister Narendra Modi chuan GST next generation kalpui tum a nih thu a puan hnu lawkah, September 22, 2025 atangin GST Net Generation Reforms 2.0 kalpui a ni ta chu lawmawm a tih thu a sawi.
GST 2.0 hi Prime Minister Modi-a’n mipui nawlpui ni tin mamawh leh leh hralhnaah harsatna an tawh thin tihzangkhaina tura hmalakna pawimawh tak a ni tih sawiin K Hrahmo chuan, “India ramin kum 2027-a ram intodelh/ram hmasawn (Viksit Bharat-2047) nih a tumna kawng pawimawh tak pakhat, huapzo hmasawnna, a te ber atanga a lian ber atana hmasawnna tluantling a thlen theina tura kailawn pawimawh tak a ni,” a ti.
K. Hrahmo chuan Next Generation GST reform (GST 2.0) atanga hlawkna dawn turte chu chhiah chawi thin nasa takin a tlahniam ang a, mamawh neih phak ngai lohte neih phah theih a ni tawh dawn a, lo neitute tan malsawmna a ni a, sumdawngte leh eichawp zuarte tan chhiah tlahniam hian nasa takin a pui dawn a, an sumdawnna a thang thei dawn a ni,” a ti.
“Mipuiten thil kan lei reng rengin GST kan chawi tel zel thin tih hi kan hriat a pawimawh hle. Dawrah kan lei emaw, online-in kan chah emaw, tax invoice kan en chuan kan GST chawi zatte a hmuhtheih a, mipui nawlpuiten hei hi kan hriat a pawimawh tak zet a ni,” a ti bawk.
Palak bialtu MLA chuan rela thil phurh man hi a tlawm hle a, Guwahati atanga Sairang thlenga bungraw phurh man relin kg-ah Rs. 2 niin, Delhi atanga Sairang pawh kg-ah Rs. 3 chauh a nih avangin road transport-ah erawh Guwahati atanga Sairang thleng kg-ah Rs 7, Delhi atanga Sairang chu kg-ah Rs 20 a ni thung a, hetiang a nih vang hian thil phurh man a intlawm hleih em em mai bakah rel chuan a thleng hma tih a sawi bawk.