Chi leh vun rawng inthliarna an dodal tlat tih puang thin eng ang mah se; spotify, Apple Music leh YouTube te hian heti ang lam hawi chawimawina leh tarlanna an chawinung hle niin, BBC-in tarlang.
An plaftorm theuhah hian inhuatna lam rawngkai leh ualau taka puanchhuahna hla thu hmuh tur leh ngaihthlak tur a awm reng a, anmahni lamin fimkhur taka kalpui nia an insawi lai hian a tak ram nen chuan a inpersan hle, tih a ni.
Hitler-a thusawi rum tak tak te, mingo chungchuan bikna leh thiltihtheihna nasa taka vawrhlar niin, thil dang te pawh ngaihthlak peiha thu a ni.
Heng streaming service te hian thil tha lo chi hrang hrang, mihringte zinga awm tawh lo tura beisei leh ngaih te hi an paih fai vek tawh tih chu tun thlenga an tanchhan ni reng mah se, BBC investigation hmuhchhuah nen chuan a inang lo hle.
Spotify hian heng thil tha lo tak takte hi hun engemaw chen a kawl khiau reng. 2018 kumtawp lam khan thenfai hna a thawk tawh a, an platform-ah hmun an chang tawh ngai lo, ti pung pung chungin a fihlim thei tak tak chuang lo. Apple Music pawh a bang bik hauh lova, an uar zual emaw tih mai tur a ni.
Hitler-a hun laia German mipui tam takin chi tha bik leh hnam ropui ber, Aryan thlah leh ‘ram’ anga an inchhalna lam hawi music a tam em em a, Juda suatna te bakah National Soclialist Black Metal nen lam a ri chuah chuah tho.
Kum 2017 khan Spotify hian supermacist band thahnem tak chu a paih a, users te’n vawi tam an ngen hnu-ah a che ve chauh. 2018 a lo thleng a, R Kelly music an thian fai vek a, hei hi mipat hmeichhiatna lama a chemawi lova puhna chhanletna a ni.