- K. Hmingthankaia
Bible-in, “Thutiam tihhlawhhlin leh si loh ai chuan tiam loh law law a tha zawk” a ti.
CSS hnathawkte nawrh avang khan sawrkar leh mi tam takin, kawng hrang hrangin harsatna inanglo tak tak nasa tak kan tawk ngei ang. Harsatna a nasa thei ang ber thlentir kha nuara nawrtu tan chuan hlawhtlinna a ni ve tlat si. Engpawh nise, kha thil thleng atang khan kan ram hian zir tur pawimawh lutuk a hmu chiang viauin ka hria.
Kan rama politician intite, mahse, ni silo, partycian-te hian ram thatna tur tak tak atana thahnemngai taka rilru seng peih tak tak si lo hian, inthlana tlin theih dan tur ngawr ngawr ringawt an ngaihtuah thin avanga khatiang thil kha thleng thin a ni.
Inthlana chak theihna tura mipui hip theih dan tur ringawt chu an rilru senna ber a ni a. Enge mipui rilru tihpuam theihna ber ni ang. Eng issue nge lian deuh ang, tih an ngaihtuah char char thina. Inthlana an chak theihna tura mipui sukthlek tidanglam thei tur nia an hriat apiang chu an tiam pawp pawp ta mai thin a ni.
A nghawng pawi tur lam emaw, a vuaklet nasat tur lam emaw, tihhlawhtlin tak tak harsat tur zia lam chu an ngaihtuah thleng phal ngai lo. Miin vawikhat vote khat a thlak tur lai chiah leh, an lal hun tur chiah bak an mitthla ngai lo a ni. A tih theih tak tak dawn leh dawn loh lamte, kan ram tan a that tak tak dawn leh dawn lohte, a tihhlawhtllin dan tur lamte, eng harsatna nge awm thei dawn? tih lam chu an ngaihtuah duh ngai lo. Eng hi nge, khawi hi nge kan tiam leh ang tih chiah an ngaituah thin vanga buai leh nuai nuai thin kan ni.
Tin, mi zawng zawng leh ram tana tha tluantling ber pawh ni kher lo, tute emaw tihlawm leh tihlungawi tumna, mi tlemte te hamthatna tur tihhlawhtlin tum reng rengin an term an hmang zova. An thutiam tihhlawhtlin theih nan sawrkar leh department hnathawh kalphung pangngai zawng zawng an tibuaia, pawisa pawh kualkawi a ngai bawka. An thutiam mi zawng zawng tana tha ber kher lo, a then phei chu mipui rilru tihkhawlohna a thlawna thil sem tih vel mai maite buaipuitirin deparment leh sawrkar hnathawkte an term an hman zawhpui leh mai thin a ni. Mi ram hruaitu thate anga ril taka thil thar leh thil tha ngaihtuahna hun an nei ta lo thin a ni.
Chuvangin, mipuite pawh hian inthlan dawna thutiam ngah lutuk party chuan hna tak tak thawk hman lo leh sawrkar tha an siam hman dawn lo tih hriain i thlang duh tawh lo ang u.
He thu hi tuna CSS chunchang chauh a ni lova, tuna ZPM sawrkar chauh demna a ni hek lo. Anni chu demna tur tehchiam an la awm lo zawk ber. An thutiamte chu a theih dan dana tihhlawhtlin tum chuan an bei chho ve zel niin a lang zawk.
Kan hun kal tawh zawng zawnga kan partycian-ten tlin chauh pilitic an khelh thin avang khan, tihhlawhtlin theih tak tak loh tur leh, tihhlawhtlin pawh nise, ram pum tana thatna tluantling ni ta tak lo an lo tiam nasat thin avang khan buaina tam tak a lo awm tawh thina. Insawichhiatna leh inchirhthehna nasa tak a thlena, an tlinpui chu an tlakpui leh thin a ni.
Tute pawhin an thutiam chu ti hlawhtling dawn mah se, kan ram leh keimahni, a mihring tan hian a tha tluantling dawn em? tih ngaihtuah hmasa thin ang u.
Thil hi kan duh ang ngawta awlsam a ni lo tih hi i hre nawn chiang hle ang u. Kan thu thua ram thil leh sawrkar thil hi tih ngawt theih a nih loh hi. Engkim hi a tih dan tur dik kual kawi fel tak a awm a ngai zel si a.
Tuna CSS hnathawkte pawh hi ZPM-in 2023 MLA inthlan hmaa thu an lo tiam tawh vanga nawr huai ngam an niin a lang. Sawrkar hnathawk la tur leh dah nghet turte hian thu tiam mai mai loh a tha. Sawrkar hian hna thawktu tur chu mamawh hle mah se, hna nghet siam (create) tur chuan hun a duh reiin, a kual kawi thui theih em hi. Pawisa a awm a ngai bawk si.
Tuna CSS hnathawkte pawh hi sawrkarin a mamawh vang leh mamawh lutuk lohte pawh an awm mai thei, a remchan dan dana lak dan chi hrang hranga a thawhtirte an ni ang. Mahse, dah nghet tur chuan chu hna, post chu siam, create phawt a ngaia, phalna leh sanction engkim a ngaia, chutiang chu thil awlai lah a ni si lo. Tin, hna nghet post chu lo siam mai pawh nise, pawisa pek tur a awm a ngai bawk si. Tin, dan ang chuan hna nghet la tur chuan advertisement chhuaha, a duh duhin an dila, exam leh interview-a tlingte chauh lak tur a la ni lehnghala. Sawrkar hna nghetah hian duh duha indah ngheh ngawt theih pawh a ni em ni le?
Tuna CSS hnathawkte pawh hian an hna thawh mek post chu dan anga a ngheta lak theih a nih hunah dan angin dil ve mai se, a latu azirin, anmahni’n an zir bawk chuan, an lo thawh rei tawhna chuan duhsak te pawh a hlawhtir mai ang chu. Tin, an hna thawh tur chu a nghet lo, mai par thlawn leh mai theihna hna, sawrkar pawhin dah ngheh a intiam miah lohna a ni tih hre chiangsa renga thawk an ni si a.
Chuvangin, sawrkar kan neih tawh zinga danglam deuh bik tura kan beisei ZPM pawh hian, CSS hnathawkte dah ngheh a lo tiam tawh a nih pawhin, huaisen takin sut leh ngam sela. Eng thilah pawh fuh lo deuh thil a awm reng rengin, party dang leh sawrkar dangte la tih duh ngai loh chu, danglam bik tum ZPM chuan, ‘E, kan lo ngaihtuah kim lo a ni. Kan lo tisual a ni’ huai tak leh tlang takin ti ngam zel thin sela chuan, ngaihgnep aiin ngaihsan an hlawh zel zawk anga. Party dang chungah an leng zel zawk ang. Ngaihdam dil ngam hi rorelnaa Pathian ram thlentir tumtute chuan an ti ngam ngei tur a ni. Tumah famkim kan awm si lova. Chuti a nih loh chuan, a hmaa mite ang thoin buaina leh sawiselna chauh an tawk leh anga, an inhnukhnawk leh zel tho ang. Chuti maia thil tha tih zung zung a theih loh hi. City bus tlan dan tihdanglam mai mai pawh tihlawhtling thei lo tan chuan, CSS employee sing chuang dah ngheh phei chu a huphurhawm khawp ang.
State dang pawhin thil mak tak tak leh buru tak tak an intiam ve tho maithei, mahse, tihlawhtling leh lo pawh nise, keini ang hian a hnuah an inchhuahchhal lehin, a state pumin an buai nuai nuai leh chuang lo a ni maithei, an thawm kan hre khat em mai. Chubakah, Kristian ram takin keini chuan, ram pum tana hmasawnna tluantling leh ngelnghet leh tih theih tak tak tur lo chu i tiam ve mai mai tawh lo ang u.
Politician inti, mahse, ni silo, partycian- ho, inthlana tlin leh lal chauh politic kheltute hian, magic man leh magic state kan nih si loh chuan, thu i tiam pawp pawp tawh lo ang u. Mipuin kan chhu zui zel tawh dawn si a.
Ka ni lovin rilruin ngawi rengin thu tiam ila, tih tak zeta beiin a takin tihlawhtling bawk ila, ram hruaitu ropui leh hlawhtling, mi zawng zawng fak phu nihna a lo ni ang.