Indian tuialhthei thlifimtute chuan Russia atangin thlitfim loh tam zawk an lei dawn niin a lang a, Washington nen sumdawnnaa indawrna a kal mek lai leh an duh loh em em laiin man tlawm lehzualin an lei thei dawn niin a lang.
Urals tuialhthei thlitfim lohte hi November thla hian barrel-ah $2 atanga $2.50 velin a man a tlawm dawn a, hei hi leisak nana man hniam tak niin tuialhthei inleisak lama hotu liante chuan an sawi a. Hetianga an inleisak a nih chuan July leh August vela tlawm hlea ngaih, barrel-a $1 chuanga tlawm an tih aiin a tlawm zawk dawn a ni.
Tun thlaah pawh hian lawng veivak chhuitute chuan India-a thleng tur a tam tih an sawi a. Russia atanga tuialhthei thlitfim loh lak luh hi October-ah hian ni tin barrel maktaduai 1.7 chuang niin Kpler Ltd chuan a sawi a. Hei hi nikum tun ang huna an lak luh zat aiin 6%-in a tam zawk.
US chuan India hi Moscow atanga tuialhthei a lak luh avanga hrem nan Indian bungrua a lak luhah chhiah a lak chu 50%-ah August atang khan a tisang a, hetih lai hian India tih ang thova ti, China leh ram dang a ti ve lo.
Donald Trump-a sorkarin a hrekna chhan let nan hian India chuan man tlawm zawka lei dan a dap zel tho va, US atang pawha lei dan a dap reng tho bawk.
Tun thleng hi chuan US nena indawrna a la kal mek avangin India hian Russian thil hi a lei chhunzawm zel dawn em tih a chiang lo tih a hriate chuan an sawi a. Thla hmasa khan New Delhi-a thuneitute chuan Washington-in Russian tuialhthei lei tihtawp a phutnaa indawrna chu ‘a tha zawngin a kal’ tih an lo sawi tawh a ni.
Hetih lai hian India-a tuialhthei buaipuitute chuan Middle East leh Africa-a a ngah ramte chu kum 2026-a inremna a awm theih nan an dawr ve mek bawk nia sawi a ni a. Thlifimtute hian tam tham taka lak luha thlitfim hnua hralh leh chu an tan a hlawk tih an sawi a ni.