ICC Men’s Test Team Ranking thar berah India cricket team chuan chanchin lawmawm tak an nei a, an kaisang nasa hle.
India hian June 6 atang khian New Chandigarh-ah Afghanistan nen Test match vawi khat an khel dawn a, hei hi kum 2026 chhunga red-ball match an khelh awm chhun tur a ni.
He inkhel zawhah hian India chuan Test cricket atangin chawlh hahdamna hun rei tak an nei ang a, hei hian player-te chawlh hahdamna leh inbuatsaihna hun tha a pe dawn a ni.
Team management pawhin series lian tham awm tur atana ruahmanna hma taka siam theihna hun tha an nei dawn bawk.
India-in Test match lian tham an hmachhawn leh tur chu anmahni ramah a ni ang a. January 21, 2027 atang hian Nagpur-ah Border Gavaskar series-ah Australia an hmachhawn dawn a. He series hi ranking atan leh ICC World Test Championship (WTC) 2025-27 cycle-a tournament lo la awm zel tur atan a pawimawh hle ang.
India hi rating point 104 hmuin 3-na dinhmunah an kaisang a. Point 102 hmua 4-na ni ta, England chu an lehpel a ni.
Australia chu point 131 nen 1-naah an la awm a, South Africa-in point 119 nen 2-na dinhmun an hauh thung.
India kaisang hian Test cricket-ah hma an sawn thui hle tih a entir a. India team hi tun hnaia series an khelhah an che tha hle a, an kaisan theihna bulpui pawimawh tak a tih theih.
He hmasawnna thlentu pakhat pawimawh tak chu Shubman Gill-a hruaina tha a ni a. Head coach Gautam Gambhir-a thutlukna siam tam tak chu rinhlelhawm thin mah se team hian tun hnaia West Indies an hmachhawnna Test series-ah hnehna an chang a ni. England-a an zinna pawh hnehtawkin an titawp bawk.
England thung chu 4-naah an tlahniam a, an result neih tharte chu 3-na dinhmun luah chhunzawm zel turin a tha tawk lo va. New Zealand-in point 101 hmuin India leh England te hnung chiahah an zui ve bawk.
India chuan hma sawn chhunzawm zel an tum dawn a. Inkhelh lo la awm turte leh mahni rama Australia laka series lian tham an khelh turte chu a pawimawh hle dawn a. Heng inkhela an chet that chuan India chu ranking-ah sang lehzuala kaisantirin WTC 2025-27 final hial an thlen phah thei a ni.