Nipui bazara buai tura inbuatsaih, Aston Villa chuan Paris Saint-Germain forward Ibrahim Mbaye chu an enthla mek.
Unai Emery naute hi Premier League-a sang zual panga zingah awmin, season thara Champions League khel phak ngei tura beisei an ni a, Europa League nomawi an lak pawhin an tling thei bawk ang.
Aston Villa hian kumin nipuiah hian player naupang zawk lak luh an tum dawn a, chung an mi awh zingah chuan Senegalese rawlthar Mbaye pawh hi a tel.
Mbaye hian a contract-ah kum hnih la nei mah se Aston Villa chauh hi beiseitu club an ni dawn lo a, chu chuan a man a tisang dawn.
Aston Villa hian Premier League leh UEFA sum hman dan inkaihhruaina an bawhchhiat loh nan fimkhur a ngai dawn a ni.
Morgan Rogers chu Premier League club hausa zawkten lak an tum dawn a, Leon Bailey leh Jadon Sancho te pawh chhuak thei an nih hmel avangin Villa hian tlar hmaa hmun hrang hranga khel thei player an zawng mek a ni.
Mbaye hi ding lama khelh nuam ti zawk a ni a, vei lamah pawh a khel thei tho bawk.
Kum 18 mi hi France-a piang a ni a; mahse, Senegal aiawha khelh a thlang zawk a, an World Cup squad-ah pawh a tel ngei a rinawm a. Teranga Lions tan hian vawi 10 khelhah goal thum a thun tawh a ni.
PSG tan pawh goal khat thunin a thiante thun tur vawi hnih a siamsak tawh bawk a. Mahse, hmun chang tura inelna a nasat avangin tun season-ah vawi 10 chiah inkhel bul a la tan.
Africa Cup of Nations atanga a kir leh hnuah Mbaye hi vawi ruk chiah a la inlan a. PSG boss Luis Enrique chuan, “PSG-a minute tin i khelh hi a danglam bik tur a ni. I inpeih at reng tur a ni. Inelna sang tak a ni satliah lo va, player thenkhat chu team pawnah an awm a ngai thin,” tiin a sawi.