Russia chuan Ukraine-a Kharkiv khawpui an kahnaa Indian zirlai kum 21 mi thihna chungchang chu a chhui dawn tih Russian Ambassador Denis Alipov chuan a sawi.
Naveen Shekarappa Gyanagoudar-a hi Kharkiv National Medical University-a damdawi zir niin kum lina a hmang mek a. Ei tur leia a chhuak chu Ukraine khawpui chhak lamah hian laipui hmanga kah fuh zingah a tel a ni.
A thiante chuan Naveen-a hi in chhung mamawhte lei turin a kal a, dawr kawta an intlar laiin laipui hian a fuh ta niin an sawi a. A hmutute chuan Russian-te hian a bul lawka sorkar building chu an kap chhe vek niin an sawi.
Foreign Secretary Harsh Vardhan Shringla chuan zirlai thihna thlen dan hi chiang taka sawi theih a la awm lo tih a sawi.
“Naveen Shekarappa Gyanagoudar-a chhungte leh India ram ka tawrhpui tak zet a ni,” tiin news agency Press Trust of India-in an kawmnaah Alipov chuan a sawi.
“Russia chuan Indian-te himna turin a theih ang zawng zawng a ti dawn a. Vanduaina thleng pawh hi ngun takin a chhui ang,” a ti.
Ukraine-in Nato ram tangrual zawm a tum duh lova thla eng emaw zat boruak a inmung hnua Ningani kal taa Russia-in a thenawm a rûn atang hian civil mi 300 chuang an thi tawh.
Thawhtanni khan UN human rights monitoring team chuan Ukraine-ah hian civil mi 376-in indona an tuar tawh a, an zinga mi 94 an thi niin a sawi a. UN hian a tak taka thi leh tuar zat hi a sang hle dawn niin an sawi bawk tih news agency Reuters chuan a tar lang.
Russia hian a thenawm ram a rûnnaah hian a tira a tih dan thlakin ramria sipai hmanga a nawr bakah khawpui lian pahnih, Kyiv leh Kharkiv chu missile leh rocket hmanga a kah atangin civil mite tawrhna a nasa zual a. Russia hian tanks, sipai phur chi hmanrua leh helicopter eng emaw zat an thawn lut tawh a ni.
India hian Russia leh Ukraine palaite chu Kharkiv leh indona hmun dang atanga Indian-te him taka an chhuah theihna tur dapsak turin a lo be ve ve tawh.
“Chiang takin, na leh ngenngawl takin Russian leh Ukrainian palaite hi him taka kan mite an chhuah theihna tura hma la tura ngen an ni tawh a; mahse, indona a la kal reng si a, kawng awm thei ang anga a tha ber kan dap zel a ni,” tiin Shringla chuan a sawi.
India hian inkahna a thlen hma hret atang khan a mite hi Ukraine atangin a la chhuak tan tawh a, tuna a hruai haw tawh zinga a tam ber hi zirlai an ni.
Ukraine-ah lo do lettutte awm mah se Russia chuan an khawpui hrang hrangte an beih chhunzawm zel a. Ukraine President Volodymyr Zelensky chuan United States chu pui thuai turin a ngen a, anmahni nawrtute chu a rang thei ang bera dan an ngai tih a sawi.
Nilainia Russian sipaiten Kharkhiv an luh laiin laipui hmanga khawpui kahnaah mi pali an thi leh mi dang pakuain hliam an tuar bawk niin emergencies services chuan a sawi.
Russian sipaite hian Kherson khawpui pawh an la tawh tih an sawi a. “Russian sipai division-te chuan Kherson-a regional centre chu an thunun fel tawh,” tiin defence ministry spokesman Igor Konashenkov chuan TV-a thu a sawiah a puang.
Russia hian ni ruk chhung an thenawm ram an rûn tawh chinah an tum angin khawpui liante an la thunun hleithei hlawm lo va. Tunah chuan khawpui liante chu na zawka beiin civil mite leh sorkar hmun pawimawhte an kap tan tawh a. Thlalem atanga thla lakah chuan Russian sipaite hi Kyiv khawpui daiah km 64 zeta thui intlarin khawpui hi luhchilh an tum hle niin a lang a. Russian defence ministry pawhin mi chengte chu insaseng turin a ti hial tawh.