Chelsea in Championship club Luton Town lakah hnehna chang tura an beih ve fe a ngai a. Khelmual pawn lama an club chanchin sawi nasat a nih zanah 3-2 in an khingpui an hneh a. FA Cup quarter-finals an lut.
Stamford Bridge a inkhel \an hma darkar khat a la awmin Chelsea neitupa Russian mi hausa Roman Abramovich chuan club a hralh tur thu a puang.
Blues in an beisei loh boruak an tawng a, khelmualah inkhelah pawh beisei loh dan taka bul \anin Reece Burke chuan minute 2-na lekah corner a\angin Luton Town tan goal a khung.
Hatters hian minute 14-naah an goalkeeper Jed Steer chu inhliam avangin an thlak a ngai a, a thlaktu Harry Isted luh a\anga minute 13 hnuah Saul Niguez chuan an si phurh a sut a. Club tana a goal hmasa ber khung turin goal hmaah a ‘cool’ zia a lantir.
Chelsea in an si phurh an sut a, mahse Hatters an la phur a, an khingpuite barakhaih ngei an tum. Halftime hma deuhin Chelsea na takin an nawr thut a, Harry Cornick chuan goal khungin Luton in hma an hruai lehnghal.
Second half-ah erawh Chelsea an nung a, na zawka goal bawkin Timo Werner chuan Ruben Loftus-Cheek ball \ha chu minute 68-naah a khung a. Minute 78-naah Lukaku goal khung tur siamsak leh bawkin Belgian striker in Chelsea a chakpui.
Chelsea manager Thomas Tuchel chuan inkhel zawhah, “Kan inkhelh dan kha \ha ka ti a, \ang ulh lo turin kan dawhthei a, chutihrualin a awl lai zawng turin ka thawkrim hle a. A pawimawh hunah tak kan tih tur tak kan ti thei \hin. Chak kan phu a, team angin ka khel\ha a, chapo viau theihna inkhel a ni lova, mahse kan inkhelh danah ka lungawi hle.” tiin a sawi.
“Midangte aiin ka hre hma deuh mai thei a, mahse inkhelh dawn hnaiah tho ka hria a. Nilengin thuthang kan hre bawk a, kan inhmuhkhawm apianga kan titi pakhat a tling. Thil lian tham tak a ni a, chuvangin engtin zel nge ni dawn tih hi ngun takin kan thlirho anga, a \ha ber zel kan beisei phawt.” tiin club hralh tur chungchang a sawi ve bawk.
Liverpool chakna Taki!
Liverpool tan Japanese forward Takumi Minamino chuan goal hnih a khung a, Carabao Cup a an hlawhtlin hnuah FA Cup lamah pawh kal zelin 2-1 in Norwich City an hneh.
Pathianni zana Chelsea nen Cup final hautak tak an khelh zawhah Liverpool in squad an neih chhah chu an lantir a. Player 10 thlak danglamin hnehna an chang tho.
Wembley a substitute bench a\anga dah luh ni lo Minamino hian minute 27-naah Divock Origi ball pek a\angin goal hmahruai a khung a. Halftime hma deuhin an goal hnihna a khung leh bawk.
First half-ah Liverpool in goal hnih khung mahse an tan second half a awlsam vek bik lova, Lukas Rupp chuan minute 76-naah Norwich City tan goal a khung a. Reds goalkeeper Alisson chuan Jonathan Rowe goal khung tur a dan a ngai bawk.
Tun season-ah Liverpool hian Norwich City hi inelna hrang hrangah vawi li an hnehna a ni tawh.
Liverpool manager Jurgen Klopp chuan, “Player 10 kan thlak a, kan rin ang ngeiin inkhel hautak a ni. Premier League a kan intawn \um ang thovin bul an \an \ha zawka, mahse minute 15 hnuah kan insiamrem a, kan zia sawt.” a ti a.
“Takumi hi player \ha tak a ni a, kan tana a la khelh\hat ber \um a ni ang. Engtiklai pawh khan a hlauhawm reng. A tel lovin quarterfinal hi kan thleng dawn lova, a tel lovin Carabao Cup final pawh kha kan khel lovang.” a ti bawk.